Panik në ajër, avioni me shqiptarë në bord pëson defekt gjatë fluturimit për në Tiranë! Kthehet me urgjencë në Londër, rrëfimi i pasagjerit

Fluturimi me shqiptarë në bord kthehet në Londër për defekt teknik

Një aeroplan i British Airways, me dhjetëra pasagjerë shqiptarë dhe shtetas të tjerë të huaj, është detyruar të kthehet në Londër pasi gjatë rrugës për në Tiranë u shfaq një defekt.

Udhëtimi kishte nisur nga aeroporti Heathrow. Pas afërsisht një ore fluturim, ekuipazhi lajmëroi udhëtarët se kishte një problem teknik dhe se fluturimi do të kthehej në Londër.

Mes pasagjerëve ishte edhe pastori Paulin Vilajeti, i cili e ndau përjetimin në rrjetet sociale.

“Pas një ore fluturim me British Airways, nga Londra për në Tiranë, avioni pësoi defekt në ajër dhe u detyruam të kthehemi sërish në Heathrow. Falë Zotit Jezus, çdo gjë përfundoi në mënyrën më të mirë të mundshme. Zbritëm shëndoshë e mirë në tokë!”, shkruan Vilajeti.

Në të njëjtin postim ai shprehu edhe reflektimet e tij, duke theksuar se u kthyen të sigurt në tokë.

“Nganjëherë, dhurata më e bukur e jetës nuk është arritja e një destinacioni… Është thjesht hiri për të qenë përsëri me këmbë në tokë. Sot nuk mbërrita në Tiranë në orar, por mbërrita më afër qiellit. Kuptova edhe një herë se jeta jonë është tërësisht në duart e Tij”, shkroi pastori.