“Paketa e Maleve” për agroturizmin, Rama sqaron çfarë përfitojnë familjet

Kryeministri Edi Rama shpjegoi sot, në podcastin e tij, përfitimet që u ofrohen personave të interesuar për investime në agroturizëm përmes “Paketës së Maleve”.

Si shembull, ai solli historinë e Entelës, e cila u kthye në Koman bashkë me familjen për të hapur aty një bujtinë. Rama e përshkroi paketën si një mundësi mbështetjeje për raste të tilla.

“Paketa e Maleve” është krijuar pikërisht për të mbështetur familje të tilla që duan të investojnë dhe të zhvillojnë zona të thella të vendit”, tha kryeministri.

Duke iu referuar përvojës në Koman, kreu i qeverisë theksoi: “Bashkia ka bërë një punë shumë të mirë. Ka pasur aplikime dhe janë shpallur edhe fitues. Nëse doni të zgjeroheni, kjo është mënyra më e shpejtë”.

Rama trajtoi gjithashtu vështirësitë që hasin qytetarët gjatë regjistrimit të pronave. Sipas tij, “Paketa e Maleve” mund të ndihmojë edhe familjet që ndodhen përballë këtyre problemeve.

Zgjidhja më e shpejtë, sipas kryeministrit, është përgatitja e një projekti të integruar me këtë skemë. Brenda të njëjtës procedurë mund të rregullohet edhe legalizimi i banesës.

Më herët, Rama kishte sqaruar dyshimet e ngritura lidhur me “Paketën e Maleve”. Ai iu përgjigj pretendimeve dhe paqartësive që janë përhapur për këtë nismë.

Kryeministri nënvizoi se paketa nuk i drejtohet oligarkëve, investitorëve të huaj apo personave të pasur. Qëllimi kryesor i saj është zgjidhja e problemeve me pronësinë e tokave të trashëguara në zonat malore.

Një kusht themelor është që qytetari të provojë posedimin real të tokës për të paktën 10 vite.

Pasi të plotësohet ky kusht, pronarët mund të formalizojnë pronësinë dhe ta kthejnë tokën në burim zhvillimi ekonomik.