Paketa e Maleve, Demo nga Elbasani: Brenda nëntorit zgjerohen zonat prioritare në Gjinar! Janë miratuar 400 zona prioritare në 52 bashki

Zonat prioritare të Paketës së Maleve në Gjinar të Elbasanit pritet të zgjerohen brenda muajit nëntor, duke u krijuar mundësi edhe banorëve që deri tani nuk përfshiheshin në zonat e miratuara për të aplikuar për investime.

Angazhimi u bë nga ministri i Punëve të Brendshme, Ervin Demo, gjatë një takimi me banorë, sipërmarrës dhe përfitues të Paketës së Maleve në Gjinar, ku u diskutuan mundësitë e zhvillimit të bizneseve familjare, turizmit malor dhe punësimit në zonë.

Në takim, ku ishin të pranishëm edhe kryebashkiaku i Elbasanit, Gledjan Llatja, zv.kryetarja e Kuvendit, Evis Kushi dhe deputeti Arbjan Mazniku, banorët ngritën shqetësime për problematikat e pronësisë, procedurat administrative dhe infrastrukturën që pengojnë realizimin e investimeve.

Demo deklaroi se brenda nëntorit pritet të miratohet vendimi i Këshillit të Ministrave për zgjerimin e zonave prioritare, bazuar në propozimin e Bashkisë Elbasan. Sipas tij, kjo do t’u mundësojë edhe banorëve të tjerë të nisin procedurat e aplikimit në Këshillin Bashkiak.

Ministri solli si shembull zhvillimin e Gjinarit, ku nga tri bujtina rreth dhjetë vite më parë, sot numërohen rreth 30 struktura akomoduese. Sipas tij, kjo dëshmon potencialin që turizmi malor ka për zhvillimin e ekonomisë lokale dhe krijimin e vendeve të punës.

Aktualisht, në shkallë vendi janë miratuar rreth 400 zona prioritare në 52 bashki, ndërsa në Gjinar janë regjistruar 21 aplikantë për të përfituar nga Paketa e Maleve.

Gjatë takimit, Demo bëri të ditur gjithashtu se Agjencia e Zhvillimit të Territorit ka krijuar një mekanizëm për trajtimin me përparësi të projekteve që përfshihen në këtë paketë, me qëllim përshpejtimin e procedurave të miratimit dhe nisjen e investimeve. Sipas tij, projektet e para kanë filluar të marrin miratimin dhe në disa zona pritet të nisë ndërtimi.

Një tjetër mundësi e prezantuar për sipërmarrësit ishte programi “Dyfisho Ndërmarrjen Tënde”, përmes të cilit bizneset ekzistuese mund të sigurojnë financim për zgjerimin e aktivitetit. Demo tha se programi ofron kredi me norma interesi 2–3% dhe mekanizma garancie shtetërore për kolateralin, në përputhje me kushtet e financimit.

Sipas ministrit, synimi i Paketës së Maleve është të nxisë investimet në zonat ku banorët kanë lidhjet e tyre familjare dhe pronësore, duke krijuar më shumë mundësi punësimi dhe duke frenuar largimin e popullsisë nga këto territore.