“Opozita peng e Berishës”- Rexhaj: Rama kërkon të instalojë mekanizmin e ‘llogaridhënies qytetare’, fokusi te komunikimi me njerëzit!

Partia Socialiste ka intensifikuar takimet me qytetarët nën programin "Prania Besnike". Qëllimi është të mbahet shënim çdo shqetësim dhe problematikë e përditshme me të cilën ata përballen.

Analisti Albatros Rexhaj komentoi këtë iniciativë për "ABC News". Sipas tij, kryeministri Edi Rama ka kuptuar që politika zhvillohet në kontakt të drejtpërdrejtë me njerëzit.

"Rama e ka kuptuar që politika bëhet aty ku janë njerëzit. Diferencën e bën komunikimi me ta. Ai po përpiqet të krijojë diçka të re, po instalojë 'llogaridhënien qytetare'. Kjo është një vlerë evropiane. Shqipëria në Europë nuk dërgohet vetëm me foto apo me reels-a", tha Rexhaj.

Analisti shtoi se qytetarët duan të dinë si funksionojnë institucionet dhe kush mban përgjegjësi kur dështojnë. "Duhet instaluar llogaridhënia në të gjitha hallkat", pohoi ai, duke shprehur besimin se Rama do t'ia dalë.

Më tej, Rexhaj u ndal edhe te opozita. Ai vlerësoi se Partia Demokratike mbahet peng nga figura e Sali Berishës. Sa i takon protestës në bulevard, analisti u shpreh se shtresa e mesme është tërhequr tashmë nga sheshi.

"Opozita ka hallet e veta. Për sa kohë do jetë Berisha, aty nuk do ketë një rikrijim. Gjithçka është nën hijen e tij", përfundoi analisti.