Operacion i madh kundër karteleve të drogës nga “Europol”, 50 të arrestuar në Ballkan! Droga kalonte me kamionë, sekuestrime nga Spanja në Turqi

Europol godet rrjetin e drogës në Ballkan, 50 të arrestuar dhe sekuestrime nga Spanja në Turqi

Të paktën 50 persona kanë rënë në pranga pas një operacioni të gjerë ndërkombëtar kundër trafikut të drogës në Ballkanin Perëndimor.

Rrjeti kriminal shtrihej në disa shtete të rajonit.

Sipas Europol-it, të arrestuarit dyshohen edhe për vrasje, rrëmbime dhe sulme me armë zjarri e granata dore në vende të ndryshme të Evropës.

Aksioni arriti kulmin më 6 tetor. Atë ditë u kontrolluan 42 lokacione në Slloveni dhe Spanjë, në një operacion ku u angazhuan autoritetet e 22 shteteve. Pjesa më e madhe e ndalimeve u krye në Slloveni. Aty u arrestuan 34 persona.

Në hetim janë përfshirë shtetas nga disa vende, përfshirë Bosnje dhe Hercegovinën, Serbinë, Slloveninë, Bullgarinë, Turqinë dhe Holandën. Sipas të dhënave hetimore, droga transportohej me kamionë në disa shtete evropiane.

Gjatë ndërhyrjes policia sekuestroi 66 kilogramë lëndë narkotike, mes tyre kanabis dhe amfetaminë. Gjithashtu u konfiskuan armë, para të gatshme dhe stoli me vlerë.