OKB kërkon qasje të plotë për hetuesit, ndërsa numri i të vdekurve në Gaza rritet

OKB-ja kërkon qasje të pakufizuar për ekipet e hetimit ndërkombëtar në Gaza. Kjo thirrje vjen teksa operacionet për nxjerrjen e mbetjeve njerëzore nga nën rrënojat vazhdojnë pa ndërprerje, gati tre vjet pas shpërthimit të luftës.

Zyra e Kombeve të Bashkuara për të Drejtat e Njeriut ka theksuar se mbledhja dhe ruajtja e provave në territoret e shkatërruara është jetike. Sipas saj, dokumentimi i viktimave dhe hetimi i shkeljeve të mundshme të ligjit ndërkombëtar varen nga kjo punë.

Një zëdhënës i agjencisë bëri thirrje që “hetuesve ndërkombëtarë t’u lejohet hyrja në çdo pjesë të Gazës”. Qëllimi është ndihma në grumbullimin e provave.

Komisioneri i Lartë për të Drejtat e Njeriut, Volker Türk, vuri në dukje se shumica e mbetjeve të gjetura deri më tani i përkasin grave dhe fëmijëve. Ky fakt, sipas tij, ngrit shqetësime të thella për mundësinë e kryerjes së krimeve të luftës.

“Po nxirren trupat e asaj që duket se janë familje të tëra, nga zona të shkatërruara plotësisht nga sulmet izraelite,” deklaroi Türk.

Ai shtoi se mbetjet e zbuluara mund të jenë vetë fillestare. “Kam frikë se jemi vetëm në majën e ajsbergut,” u shpreh ai, duke iu referuar faktit se një pjesë e madhe e enklavës palestineze është zhdukur nga bombardimet apo operacionet e prishjes.

Në disa zona ku ushtria izraelite ende qëndron, ndërtesa prishen ende me buldozerë. Kjo ndodh pa u marrë parasysh mundësia e pranisë së njerëzve nën rrënoja, sipas Komisionerit.

Sipas të dhënave nga Mbrojtja Civile Palestineze, mbi 630 trupa dhe mbetje janë nxjerrë nga rrënojat në të gjithë Gazën që nga nëntori i vitit të kaluar. Zyra për të Drejtat e Njeriut citoi edhe vlerësimet se mbi 8,000 persona mund të jenë ende të zhdukur nën gërmadhat.

Këto shifra tregojnë përmasën e shkatërrimit. Numri i vërtetë i viktimave ende nuk dihet.

Türk kërkoi që të bëhet çfarë është e mundur për identifikimin e viktimave. Ai theksoi nevojën për ruajtjen e të dhënave mjeko-ligjore, mostrave biologjike dhe regjistrimin e vendeve të varrimit. familjeve duhet t’u njoftohet menjëherë.

Zbulimi i sasive të mëdha të mbetjeve në Gazë rikthen alarmin për krime lufte. Lufta aktuale filloi pas sulmit të Hamasit ndaj Izraelit më 7 tetor 2023. Sipas të dhënave zyrtare izraelite, në atë sulm u vranë të paktën 1,195 persona.

Pas tij, Izraeli nisi një fushatë të gjerë ajrore dhe ofensivë tokësore në Gaza. Territori u shkatërrua në shkallë të gjerë.

Ministria e Shëndetësisë në Gaza, që vepron nën autoritetin e Hamasit, raporton mbi 73,000 viktima palestineze. Mbi 1,350 prej tyre kanë humbur jetën që nga nënshkrimi i armëpushimit të tetorit të kaluar.

Këto të dhëna, të publikuara nga autoritetet shëndetësore të drejtuara nga Hamasi, mbeten subjekt debatesh ndërkombëtare. Dokumentimi i plotë i humbjeve vazhdon të jetë i pamundur.

Thirrja e OKB-së vjen në një kohë kur dëmet civile po dalin në sipërfaqe çdo ditë. Për qeveritë evropiane, të cilat po përballen me pasojat diplomatike, kërkesa shton presionin mbi Izraelin.

Objektivi tani është më i gjerë sesa numri i përgjithshëm i të vrarëve. Bëhet fjalë për identifikimin e çdo viktimë, ruajtjen e provave dhe zbardhjen e rrethanave të vdekjes.