“Nuk mirëpres vetëm ata që bëjnë dhunë”, Rama vendos karrige për dialog para Kryeministrisë (VIDEO)

**Karriget me mbishkrimin “dialog” para Kryeministrisë, Rama: Gati për bisedime pa kushte**

Karrige të vendosura para hyrjes së Kryeministrisë, secila me fjalën “dialog” të shkruar sipër. Ky është veprimi që ka ndërmarrë kryeministri Edi Rama, i cili përmes tyre ka dashur të japë një mesazh të qartë: gatishmëri për komunikim dhe dëgjim me këdo.

Sipas tij, dera e bisedimeve mbetet e hapur pa asnjë kusht, në çdo vend dhe në çdo orë. Kjo përfshin edhe hapësirën përpara godinës së qeverisë, aty ku janë vendosur karriget.

Rama ka nënvizuar se dialogu vazhdon të jetë një mundësi për të gjithë ata që zgjedhin rrugën e komunikimit paqësor. Nga kjo skemë përjashtohen ata që ushtrojnë dhunë, si dhe personat që nuk marrin distancë nga ajo.

“Kush do dialog, pa kushte, ku të dojë, kur të dojë, edhe këtu po të dojë. Unë jam në dispozicion së bashku me qeverinë. Të vetmit që nuk janë të mirëpritur janë ata që bëjnë dhunë dhe ata që nuk distancohen nga dhuna”, u shpreh ai.