“Nuk e pret Amerika”, Ngjela zbulon çfarë fshihet pas vizitës së Berishës në SHBA

**Statusi “non grata” i Sali Berishës në Shtetet e Bashkuara mbetet i pandryshuar, edhe pse lideri i Partisë Demokratike arriti të sigurojë një vizë amerikane. Kjo është vërejtja kryesore e avokatit Spartak Ngjela në komentin e tij mbi udhëtimin e Berishës drejt SHBA-së.**

Ngjela theksoi se Demokratët krijuan një shtrembërim realiteti rreth vizitës. Sipas tij, u sugjerua që Berisha ishte ftuar nga presidenti amerikan, një narrativë e pavërtetë. Avokati shprehet se kjo taktikë dëshmon se PD vazhdon të jetë e kapluar nga politika e vjetër e viteve ’90, e bazuar në gënjeshtra dhe deklarata boshe.

“Politika me gënjeshtrën ka dominuar gjithë perëndimin. Gënjeshtra në fushata elektorale është dominonte. Politika është e tillë. Ai nuk doli nga tipi i tij i të pavërtetës. Ai shkoi në SHBA se i dhanë vizë. Kaq ishte! Kush e pranon atje? De facto ai është kryetari i opozitës po kush e priti atje? Këtu mbaron biseda. Nuk e presin se është non-grata në amerikë. Nëse atje e pret një ministër, pas dy ditësh ministri hiqet. PD e krijoi si falsitet, e mori sikur e kishte ftuar presidenti i vendit. Janë politika të një niveli të ulët. PD nuk ka dalë nga kjo politikë. Është viktimë e 90ës. Ka ndryshim por ka dhe stanjacion. Nuk rrëzohen socialistët me vota. PD nuk e rrëzon dot PS. Ai është non-grata në Amerikë. Nuk vjen dot në pushtet. Nuk e lë BE dhe amerikanët” tha Ngjela.

Për Ngjelën, kjo sjellje pengon seriozisht mundësinë e kthimit të PD në pushtet. Me një lider që mban statusin “non grata” në Uashington, partia nuk ka si të formojë qeveri. Madje, edhe nëse do të fitonte shumicën e votave, një skenar i tillë nuk do të ishte i zbatueshëm, pasi udhëheqja ndërkombëtare, veçanërisht BE dhe Shtetet e Bashkuara, nuk do ta lejonte atë. Kështu, sipas tij, PD mbetet e paralizuar nga një politikë e vjetër dhe e dështuar.