Një rol e bëri të urryer nga publiku, më pas u bë një nga aktorët më të dashur të ekranit

Nga antagonisti që publiku nuk e duronte dot, te presidenti që fitoi zemrat e miliona shikuesve

Një refuzim në restorant dhe më pas adhurimi masiv si kreu i Shtëpisë së Bardhë në ekran. Rrugëtimi i Tony Goldwyn është plot me kthesa të papritura.

Për shumë vite, aktori u ndesh me antipatinë e shikuesve për shkak të një personazhi të vetëm. Një kameriere nuk pranoi t'i shërbente në lokal, me arsyetimin se nuk i kishte falur atë që i bëri Patrick Swayze-t në film. Më vonë, i njëjti aktor u kthye në një nga figurat më të pëlqyera presidenciale të televizionit amerikan, i ndjekur me entuziazëm nga gratë në mbarë botën.

Fjala është për Tony Goldwyn. Aktor, regjisor e producent, ai ka krijuar gjatë dekadave profilin e një artisti polivalent dhe shumë të vlerësuar në Hollywood.

Rrënjët e thella në industrinë e filmit

Ndryshe nga kolegët që e nisin nga e para, Goldwyn u lind brenda kinemasë. Gjyshi i tij ishte Samuel Goldwyn, pionier i Hollywood-it dhe një nga themeluesit e studios së famshme Metro-Goldwyn-Mayer.

Edhe i ati, Samuel Goldwyn Jr., la gjurmë si producent filmash.

Pavarësisht mbiemrit të madh dhe dyerve të hapura, Tony zgjodhi rrugën e formimit serioz. Ndoqi studimet në Universitetin Brandeis dhe më pas në Akademinë Londineze të Muzikës dhe Artit Dramatik, LAMDA. Fillimisht u formua në teatër. Vetëm më pas u zhvendos drejt kinemasë dhe televizionit, transmeton ABC24.AL.

Nga i keqi i filmit Ghost te kreu i shtetit te Scandal

Njohja e gjerë erdhi me Carl Bruner te Ghost, në vitin 1990. Ai mishëroi një njeri të akullt dhe të etur për përfitim, i cili tradhton mikun e ngushtë Sam, rol i luajtur nga Patrick Swayze.

Interpretimi ishte aq i besueshëm sa publiku e mbajti inatin ndaj Goldwyn edhe jashtë xhirimeve. Për një kohë të gjatë, ai identifikohej me fajtorin e filmit.

Kthesa e madhe erdhi me serialin Scandal. Mes viteve 2012 dhe 2018 ai veshi petkun e presidentit Fitzgerald Grant. Karizmatik dhe njëherësh i ndërlikuar, ky personazh i hapi një kapitull krejtësisht të ri. Erdhi një audiencë tjetër dhe një popullaritet i ripërtërirë.

Zëri pas Tarzanit dhe projektet e mëdha kinematografike

Pak e dinë se Goldwyn i dha zë Tarzanit te filmi i animuar i Disney-t me të njëjtin titull, në 1999.

Lista e filmave ku ka marrë pjesë përfshin tituj si The Last Samurai, Divergent, King Richard dhe Oppenheimer i Christopher Nolan.

Së fundmi iu bashkua edhe kastit të Law & Order, në rolin e prokurorit.

Suksesi edhe prapa kamerës

Përtej aktrimit, ai ka ndërtuar një karrierë solide si regjisor. Ka firmosur filmat A Walk on the Moon dhe Conviction. Gjithashtu ka drejtuar episode të serialeve Scandal, Dexter dhe Grey's Anatomy.

Kjo lëvizje e natyrshme mes interpretimit, regjisë dhe produksionit e ka bërë emër të sigurt në industri.

Dashuri e qëndrueshme larg tabloideve

Në ndryshe nga shumëat të qëart për për Hollywood-izim, jan yll kur. Ndryshe nga shumë martesa të Hollivudit që përfundojnë në faqet rozë për ndarje e bujë, jeta private e Goldwyn ka qenë e qetë.

Prej vitit 1987 ai është i lidhur me Jane Musky. Ajo është skenografe dhe dizajnere produksioni. Edhe ajo kontribuoi te Ghost, si dhe te projekte të njohura si When Harry Met Sally.

Çifti ka dy vajza. Anna dhe Tess. E para i është përkushtuar skenarit dhe produksionit, e dyta aktrimit dhe regjisë.

Ata kanë preferuar ta mbajnë familjen larg zhurmës dhe ekspozimit të tepërt mediatik.

Angazhimi nuk kufizohet vetëm te sheshi i xhirimit. Goldwyn mbështet nisma shoqërore dhe artistike, mes tyre fushata në mbrojtje të të drejtave të njeriut dhe projekte publike.

Nga figura që ngjallte antipati në sallë, në një nga fytyrat më të dashura të ekranit amerikan. Karriera e tij tregon se një rol mund të të ndjekë gjatë, por nuk të përcakton fatin përgjithmonë. /ABC24.AL/