Nisin punimet për Bypass-in e Elbasanit, Karakaçi: Projekti lidh korridoret kryesore rrugore

Kryeministri Enea Karakaçi bëri të ditur se kanë nisur zyrtarisht punimet për ndërtimin e bypass-it të Elbasanit. Ky segment rrugor pritet të lehtësojë ndjeshëm trafikun dhe të përmirësojë lidhjen midis Tiranës, jugut dhe juglindjes së vendit.

Gjatë një deklarate për mediat, ministri i Infrastrukturës dhe Energjisë specifikoi se projekti do të ndërtohet sipas standardeve të autostradës ekzistuese Tiranë-Elbasan. "Kemi filluar punimet në bypassin e Elbasanit," njoftoi ai, duke shtuar se fillimi i punëve është pikërisht aty ku përfundon hinka e autostradës aktuale.

Sipas Karakaçit, vepra do të jetë një autostradë e kategorisë A. "Do të jetë autostradë e kategorisë A, sipas të njëjtave standardeve që është aktualisht sot rruga Tiranë-Elbasan," theksoi ai.

Projekti ka për qëllim të zgjidhë problemin e trafikut të rënduar, veçanërisht gjatë sezonit turistik. Ministri bëri të ditur se Autoriteti Rrugor Shqiptar ka lidhur tashmë dy kontrata për këtë vepër. Segmenti i parë ka nisur menjëherë pas përfundimit të rrugës Tiranë-Elbasan.

"Ecuria e punimeve është e mirë, pasi kantieri është i hapur dhe shpronësimet ishin kryer më herët," u shpreh Karakaçi. Aktualisht, punimet po kryhen në tri kilometrat e parë të segmentit, deri afër kombinatit metalurgjik të Elbasanit.

Ministri bëri të ditur se pjesa vijuese deri afër Peqinit pritet të hyjë në prokurim gjatë vitit pasardhës.

I pyetur për rëndësinë e këtij investimi, Karakaçi shpjegoi se bypass-i do të lidhë korridoret kryesore rrugore. "Kemi vazhdimin e autostradës Tiranë-Elbasan. Bëjmë ndarjen e trafikut ndërmjet pjesës juglindore dhe jugore të Shqipërisë," tha ai.

Sipas tij, projekti do të krijojë një ndërlidhje të integruar. "Ndërlidhim autostradën Tiranë-Elbasan, bypassin e Elbasanit dhe dalim në vazhdimin e korridorit Elbasan-Qafë Thanë, duke i dhënë një zgjidhje të integruar gjithë pjesës së trafikut në Shqipëri," përfundoi ministri Karakaçi.