Nga stadiumet te përvoja e tifozëve/ Shefi i operacioneve në UEFA, Poisson flet për përgatitjet e EURO U-21 2027

Shqipëria po bëhet gati për Europianin U-21 të vitit 2027, i cili do të mbahet në territoret shqiptare. Pjesë e këtij procesi përgatitor është edhe inspektimi i vazhdueshëm nga ana e UEFA-s në stadionet dhe qytetet që do të presin ndeshjet e turneut.

Në vizitat e fundit, ekspertët e unionit evropian po shqyrtojnë nga afër kushtet teknike të impianteve. Po ashtu, po identifikohen investimet e nevojshme për t'i përshtatur fushat me kërkesat e kompeticionit.

Guillaume Poisson, Drejtori i Operacioneve në UEFA, theksoi rëndësinë e këtij inspektimi në një prononcim për faqen zyrtare të FSHF-së. Ai foli për përgatitjet në terren dhe pritjet nga ky eveniment.

“Është vërtet shumë e rëndësishme për një vend si Shqipëria të ketë mundësinë të organizojë një prej turneve madhore të UEFA-s. Mendoj se kjo është një dëshmi e besimit që kemi te Federata Shqiptare e Futbollit dhe te aftësia e saj për të organizuar turnetë tanë. Kjo është një mundësi e shkëlqyer për të treguar se çfarë ka për të ofruar Shqipëria, çfarë mund të ofrojë sot dhe çfarë do të jetë në gjendje të ofrojë verën e ardhshme”, deklaroi Poisson.

Sipas tij, delegacioni ka vizituar qytetet e Shkodrës dhe Elbasanit për të parë nga afër gjendjen e stadiumeve atje. U evidentuan detyrat që duhen kryer nga autoritetet vendore.

“Kemi qenë në Shkodër dhe në Elbasan për të vizituar stadiumet. Tashmë kemi evidentuar të gjitha përmirësimet dhe ndërhyrjet që duhen bërë. Qytetet pritëse i kanë marrë këto informacione dhe raportet përkatëse, ndaj e dinë se çfarë duhet të bëhet. Ne do të rikthehemi në muajin mars. Kjo do të jetë vizita jonë e fundit e punës, për të bërë vlerësimin përfundimtar dhe për të parë nëse impiantet dhe stadiumet janë gati për të pritur turneun”, u shpreh Drejtori i Operacioneve në UEFA.

Poisson ndalesi veçanërisht te përvoja e plotë që duhet u ofrohet tifozëve. Ai vuri në dukje rolin e madh të publikut në suksesin e eventit.

“Një ndeshje futbolli, veçanërisht në kuadër të një Kampionati Evropian U-21, nuk përbëhet vetëm nga 90 minutat e futbollit. Duhet të kemi parasysh të gjithë përvojën e spektatorit, përtej 90 minutave të futbollit.

Mendoj se publiku ka një rol shumë të madh për të luajtur: të jetë i pranishëm, të mbështesë komunitetin, të mbështesë vendin dhe të tregojë se Shqipëria di ta festojë futbollin dhe di t’i japë vëmendjen e merituar yjeve të së ardhmes.

Është një destinacion i mrekullueshëm për të kaluar verën e vitit 2027, ose të paktën periudhën nga 16 qershori deri më 3 korrik, kur turneu do të zhvillohet këtu. Ejani në Shqipëri, blini një biletë për një ndeshje dhe zbuloni këtë vend të bukur”, – përfundoi Guillaume Poisson.