Nga këshilltare në BKH në krye të Burgjeve: Kush është Sadleva Bodo që zëvendëson Adriatik Kupin

Sadleva Bodo pritet të marrë drejtimin e Drejtorisë së Përgjithshme të Burgjeve. Ajo do të pasojë në këtë detyrë Adriatik Kupin, i cili u largua pas vetëm shtatë muajsh në krye të sistemit penitenciar.

Emri i Bodos vjen nga Byroja Kombëtare e Hetimit. Aty ajo ka punuar për pesë vite si këshilltare ligjore e drejtorit. Fillimisht ka qenë pranë Aida Hajnajt dhe më pas ka vazhduar detyrën nën drejtimin e Joni Ketës.

Përpara kësaj periudhe, Bodo ka mbajtur një tjetër post të rëndësishëm. Nga maji i vitit 2018 deri në gusht 2021 ajo drejtoi Drejtorinë e Integrimit Europian dhe Asistencës në Ministrinë e Brendshme. Kjo përfshin edhe kohën kur ministria drejtohej nga Fatmir Xhafaj.

Tri ditë para se emri i saj të përflitej si kandidatja kryesore, ajo zhvilloi një takim privat në Kryeministri. Më 9 tetor, Bodo u takua me kryeministrin Edi Rama në ambientet e Kryeministrisë.

E lindur më 29 janar 1988, ajo ka përfunduar studimet për Drejtësi në Universitetin e Tiranës. Më pas kreu studime pasuniversitare në Shtetet e Bashkuara të Amerikës dhe në Holandë. Marrja zyrtare e detyrës prej saj pritet të bëhet të mërkurën, më 14 tetor.