Nga interpelancat me 5 ministra, tek votimi i draftit për pagat e magjistratëve! Çfarë pritet në seancën e së enjtes në Kuvend, zbardhet rendi

Kuvendi i Shqipërisë do të mbajë seancë plenare ditën e enjte, më 17 shtator. Në rendin e ditës janë parashikuar çështje të rëndësishme, përfshirë disa interpelanca me anëtarë të qeverisë.

Katër interpelanca urgjente me ministrat e Mjedisit, Punëve të Brendshme, Arsimit dhe Shëndetësisë do të zhvillohen sipas kërkesës së një grupi deputetësh nga Partia Demokratike. Po ashtu, është parashikuar edhe një takim me Ministrin e Infrastrukturës dhe Energjisë, Enea Karakaçi, me iniciativë të deputetit Blendi Himçi.

Më pas, ligjvënësit do të votojnë për disa projektligje të rëndësishme. Midis tyre janë ratifikimi i Konventës për Themelimin e Komisionit Ndërkombëtar të Kërkesave për Ukrainën, si dhe Konventa Kuadër e Këshillit të Evropës për Inteligjencën Artificiale, të Drejtat e Njeriut, Demokracinë dhe Shtetin e së Drejtës.

Gjithashtu, në seancë do të diskutohet dhe votohet për ndryshime ligjore. Këto përfshirin amendamente në ligjin për statusin e gjyqtarëve dhe prokurorëve, një projektligj të ri për dizenjot, si dhe modifikime në ligjin që rregullon marrjen në kontroll të shoqërive me ofertë publike.

Komisioni i Ligjeve, si organi përgjegjës, ka miratuar tashmë draftin e Partisë Socialiste për rritjen e pagave të magjistratëve. Vendimi u mor me 8 vota pro nga mazhoranca dhe 3 kundër nga opozita. Ky projektligj pritet t'i nënshtrohet votimit në seancën plenare të 17 shtatorit.

Sipas draftit të PS, parashikohet një rritje me afërsisht 8500 lekë për rrogën referuese të magjistratëve. Megjithatë, pretendimi i tyre, i mbështetur edhe nga Këshilli i Lartë Gjyqësor dhe Këshilli i Lartë i Prokurorisë, ishte shumë më i lartë, me vlerë rreth 80 mijë lekë më tepër.

Seanca do të përfundojë me diskutimin e çështjeve jashtë rendit të ditës. Deputetët do të kenë një kohëtotale prej deri 60 minutash për këto çështje.