“Nëse Rama jep dorëheqjen, a e ka PD-ja ekipin gati?”, debat mes pedagogut dhe zyrtarit demokrat

Në debatin televiziv "Off the Record" të moderuar nga Andrea Danglli në A2CNN, pedagogu Rezart Prifti dhe anëtari i Këshillit Kombëtar të PD-së, Lisandër Hoxha, u përplasën mbi gatishmërinë eventuale të opozitës për të qeverisur.

Prifti ngriti një hipotezë: nëse kryeministri Rama të nesërmen do të largohej, a ka Partia Demokratike një plan të gatshëm dhe ekip të formuar për të marrë drejtimin e shtetit? "Unë si qytetar duhet të imagjinoj se kush do të merret me financat, me bujqësinë, me të gjitha", u shpreh ai, duke kërkuar një përgjigje konkrete nga përfaqësuesi demokrat.

Hoxha refuzoi kategorikisht hyrjen në një skenar të tillë "sikur". "Nuk ndodh kjo", tha ai, duke u mbështetur në proceset e brendshme dhe garat e partisë. Prifti e sfidoi duke thënë se e njeh mirë proceset e brendshme, duke iu referuar një përvoje të kaluar personale.

Debati u thellua kur Prifti e pyeti drejtpërdrejt se çfarë do të bënte PD-ja në rast largimi të kryeministrit. Hoxha u përgjigj se nuk mund të merret me supozime dhe se një ekip qeverisës i opozitës nuk ekziston ende sepse vendi nuk ndodhet në një proces zgjedhor. "Ku t'i nxjerr unë?", shtoi ai.

Në përfundim, Prifti nxori përfundimin e tij: sipas tij, PD-ja nuk ka asnjë nga elementët e nevojshëm, asnjë ekip, njerëz apo ide. Hoxha e kundërshtoi, duke u shprehur se PD-ja ka burime njerëzore cilësore, por se kjo lloj retorike nuk ka sens. Sipas tij, formimi i ekipeve për qeverisje ndodh natyrshëm gjatë zgjedhjeve.