Ndryshime në Policinë e Shtetit, emërohen drejtuesit e rinj në Berat, Sarandë dhe Dibër

Drejtori i Përgjithshëm i Policisë së Shtetit ka urdhëruar disa ndryshime në kupolën drejtuese të strukturave vendore. Lëvizjet janë zyrtarizuar me urdhër të firmosur së fundmi.

Në Berat, drejtimi i policisë vendore i është besuar Dritan Lenës. Ai mbante deri tani detyrën e Shefit të Sektorit të Planifikimit Operacional në Drejtorinë e Forcës Kombëtare të Sigurisë. Me vendimin e ri, Lena transferohet dhe merr postin e Drejtorit të Drejtorisë Vendore të Policisë Berat.

Ndryshime ka edhe në nivel komisariatesh.

Kryekomisari Saimir Shkambaj largohet nga Tropoja, ku drejtonte Komisariatin e Policisë. Ai është transferuar dhe emëruar në krye të Komisariatit të Policisë Sarandë.

Ndërkohë, posti në Sarandë lirohet nga Komisar Feliks Hoda. Hoda, i cili drejtonte deri tani Komisariatin e Sarandës, do të marrë drejtimin e Komisariatit të Policisë Dibër. Edhe ai është transferuar me të njëjtin urdhër.

Në Tropojë, vakanca e krijuar pas lëvizjes së Shkambajt do të mbulohet nga Andi Kano. Komisari shërben aktualisht si Shef i Hetimit të Krimeve në këtë komisariat. Ai është komanduar përkohësisht në detyrën e Shefit të Komisariatit të Policisë Tropojë.