Murinjo s’ka rregulluar asgjë, Reali si ‘vullkan i fjetur’! Plas sërish grushti në stërvitjen e madrilenëve

Real Madrid po përgatitet të rikthehet në fushë pas pauzës së kombëtareve, por situata brenda klubit vazhdon të jetë larg qetësisë së shumëpritur.

Ardhja e José Mourinho në stolin madrilen u shoqërua me pritshmëri të mëdha për rikthimin e skuadrës në luftën për titull, por problemet brenda grupit duket se ende nuk janë zhdukur.

Sipas Cadena SER, atmosfera në dhomën e zhveshjes mbetet e ftohtë dhe trajneri portugez nuk ka arritur deri tani ta ndryshojë dinamikën e krijuar prej muajsh. Gazetari Antón Meana ka dhënë një sinjal të fortë në lidhje me situatën, duke thënë se ajo është praktikisht e njëjtë me atë të pesë muajve më parë.

Në emisionin El Larguero, Meana ka bërë të ditur se brenda grupit madrilen ka pasur edhe episode fizike mes futbollistëve.

Sipas tij, dy lojtarë kanë përfunduar në një përleshje, por identitetet e tyre nuk janë bërë publike. Informacioni vjen në një moment kur Real Madrid po përpiqet të lërë pas problemet e sezonit të kaluar dhe të rikthejë stabilitetin në skuadër.

Kjo nuk është hera e parë që dhoma e zhveshjes së Real Madridit përballet me një situatë të tillë. Në fundin e sezonit të kaluar, Federico Valverde dhe Aurélien Tchouaméni u përfshinë në një konflikt që u përshkallëzua edhe në dhomën e zhveshjes. Valverde përfundoi në spital pasi u rrëzua dhe u përplas me një tavolinë, ndërsa klubi hapi procedurë disiplinore ndaj të dyve.

Kur mori drejtimin e Real Madridit, Mourinho ishte në dijeni të tensioneve të krijuara gjatë sezonit të kaluar. Në gusht, trajneri portugez deklaroi se kishte ardhur me shumë informacion, por kishte vendosur të niste gjithçka nga e para.

Mourinho tha atëherë se marrëdhënia mes Tchouaméni dhe Valverde dukej normale dhe se nuk kishte pasur nevojë të ndërhynte për të rikthyer paqen mes tyre.

Situata vjen në një moment delikat për skuadrën madrilene. Pas pauzës së kombëtareve, Real Madrid ka përpara një seri ndeshjesh të rëndësishme, përfshirë përballjen me Villarreal, transfertën ndaj Roma në Champions League dhe sfidën ndaj Barcelona në La Liga.

Sipas Cadena SER, Barcelona aktualisht kryeson me pesë pikë avantazh ndaj Real Madridit, duke e bërë periudhën e ardhshme veçanërisht të rëndësishme për skuadrën e Mourinho-s.

Për momentin, identiteti i dy lojtarëve që dyshohet se janë përfshirë në përplasjen e fundit mbetet i panjohur.