Moti i keq/ Reshjet e shiut shkaktojnë rënie gurësh në aksin Burrel-Skuraj, rrezik për drejtuesit e mjeteve

Reshjet e shiut që filluan mbrëmjen e kaluar kanë sjellë vështirësi në qarkullimin rrugor në aksin nacional Burrel-Skuraj. Situata paraqitet më problematike në segmentin e Shkopetit. Aty po raportohet rënie e vazhdueshme gurësh dhe shkëmbinjsh mbi rrugë si pasojë e motit të keq.

Terreni i thyer në këtë pjesë dhe mungesa e rrjetave mbrojtëse favorizojnë shkëputjen e masivit shkëmbor. Kjo e kthen zonën në rrezik të vazhdueshëm për shoferët që udhëtojnë në këtë aks.

Në terren ndodhen tashmë ekipet e mirëmbajtjes rrugore. Ato po punojnë për pastrimin e rrugës dhe menaxhimin e situatës. Ndërsa ndërhyrja vijon, drejtuesit e mjeteve këshillohen të lëvizin me kujdes të shtuar. Kujdesi është i domosdoshëm sidomos gjatë kalimit në segmentin e Shkopetit.