“Moment i rëndësishëm për Shqipërinë” – Dje mori detyrën, ambasadorja e BE në Tiranë jep mesazhin e parë: Jam këtu për të mbështetur çdo hap drejt integrimit (VIDEO)

Ambasadorja e re e Bashkimit Europian në Tiranë, Sofia Moreira de Sousa, ka dhënë të parën reagim publik ditën pasi ka marrë zyrtarisht detyrën, duke zëvendësuar Silvio Gonzaton në krye të Delegacionit të BE-së në Shqipëri.

Diplomatja portugeze iu drejta publikut shqiptar përmes një videomesazhi të postuar në rrjetet sociale. Ajo shprehu nderin e saj për shërbimin në këtë vend në një periudhë kaq përcaktuese për rrugën e tij drejt Bashkimit Europian.

Mandatit të saj katërvjeçar i paraprin një angazhim i qartë. Moreira de Sousa tha se do të punojë së bashku me stafin e delegacionit për të përkrahur çdo hap të Shqipërisë drejt integrimit europian. Ajo theksoi se bashkëpunimi me shtetet anëtare do të jetë prioritet.

“Është një nder të jem këtu, në një moment kaq të rëndësishëm në rrugëtimin e Shqipërisë drejt Bashkimit Europian. Së bashku me ekipin tim në Delegacionin e BE-së, jam këtu për të mbështetur çdo hap të shqiptarëve drejt integrimit,” u shpreh ajo në videon e publikuar.

Diplomatja vlerësoi gjithashtu mikpritjen e njohur të shqiptarëve. Ajo shfaqi dëshirën e saj për të vizituar të gjithë territorin e vendit gjatë misionit diplomatik.

“Kam dëgjuar shumë për mikpritjen e popullit shqiptar dhe mezi pres të udhëtoj nëpër vend, për ta përjetuar dhe dëshmuar vetë,” deklaroi Sofia Moreira de Sousa, duke përmbyllur mesazhin e parë me fjalën shqipe: “Mirupafshim!”.