Ministri polak: Putin mund të jetë duke përgatitur “diçka të madhe”

Ministri i Jashtëm i Polonisë ngre alarmin për lëvizje të mundshme të Moskës këtë vit. Radoslaw Sikorski deklaroi se Rusia po planifikon një operacion në shkallë të gjerë dhe nuk përjashtohet inskenimi i një sulmi për të legjitimuar një valë të re mobilizimi.

Deklaratat u bënë në New York, gjatë një takimi në Këshillin për Marrëdhëniet me Jashtë. Sikorski tha se informacioni vjen nga burime të shumta.

“Po marrim informacione, nuk po i zbulojmë burimet, por ka shumë prej tyre, se Rusia po përgatit diçka të madhe këtë vit”, u shpreh ai.

Sipas tij, Kremlini ka nevojë për një justifikim. Ai shtoi se presidenti rus kërkon një pretekst.

“Unë besoj se Putinit i duhet një pretekst për mobilizim, në mënyrë që të kryejë një sulm të rremë dhe t’i thotë popullit rus: ‘Ne jemi nën sulm dhe për këtë arsye duhet të mobilizohemi’”, tha Sikorski.

Detaje konkrete nuk dha. Shefi i diplomacisë polake nuk specifikoi se çfarë parashikon operacioni i përfolur.

I pyetur për skenarët e mundshëm, ai përmendi shqetësimin në Bjellorusi. Sipas tij, atje ekziston frika e përfshirjes direkte në luftën kundër Ukrainës.

Në të njëjtën linjë, Sikorski paralajmëroi për rrezikun në Baltik. Vendet baltike ku jetojnë pakica ruse mund të përballen me tensione në rritje. Aleanca e NATO-s, theksoi ai, duhet të jetë e përgatitur për të parandaluar çdo agresion të mundshëm.