Ministri Nufi takohet me Ambasadorin e ri amerikan në Tiranë, Eric Wendt: Me SHBA, Shqipëria qëndron krah për krah për lirinë, sigurinë dhe paqen!

Ministri i Mbrojtjes, Ermal Nufi, priti sot në Tiranë ambasadorin e ri të Shteteve të Bashkuara, Eric Wendt.

Takimi u zhvillua më 2 tetor.

Përmes një postimi në rrjetet sociale, Nufi i uroi mirëseardhjen diplomatit amerikan.

“Ambasador Wendt, mirë se erdhët në Shqipëri!” – u shpreh ai.

Në mesazhin e tij, ministri theksoi peshën e veçantë të partneritetit me Uashingtonin. Sipas tij, Shtetet e Bashkuara mbeten partner i pazëvendësueshëm për Shqipërinë në fushën e mbrojtjes dhe sigurisë.

Nga ana tjetër, Shqipëria i sjell këtij bashkëpunimi pozicionin e saj gjeografik me rëndësi strategjike, besueshmëri dhe vullnet të qartë për të bashkëpunuar.

Nufi veçoi disa asete kyçe në këtë drejtim. Ai përmendi Korridorin VIII, Portin e Romanos, Bazën Ajrore të Kuçovës si dhe kapacitetet për Mbështetjen e Vendit Pritës.

Sipas ministrit, këto elementë forcojnë arkitekturën e Aleancës dhe rrisin lëvizshmërinë e saj në Evropën Juglindore.

Në postim theksohet edhe roli aktiv i vendit tonë për paqen dhe sigurinë.

“Nga mbështetja për Ukrainën dhe prania në KFOR, tek shumë iniciativa shumëkombëshe, apo vendimi për pjesëmarrjen në Forcën Ndërkombëtare të Stabilizimit në Gaza – Shqipëria dëshmon se është tashmë një aleate e besuar dhe e aftë të kontribuojë për sigurinë dhe paqen.”

Në mbyllje të reagimit, kreu i Mbrojtjes rikonfirmoi qëndrimin e Tiranës krah Uashingtonit.

“Me Shtetet e Bashkuara, Shqipëria qëndron krah për krah – për lirinë, sigurinë dhe paqen”, përfundoi ai.