MiG-u ukrainas rrëzon dronin rus Geran-4, pamjet filmohen nga kabina e pilotit

Një aeroplan luftarak ukrainas i tipit MiG-29 ka interceptuar dhe rrëzuar në ajër një dron rus kamikaz me motor reaktiv, të tipit Geran-4. Pamjet e publikuara në rrjetet sociale tregojnë momentin e goditjes nga perspektiva e pilotit ukrainas.

Në video shihet aeroplan luftarak duke manovruar në ajër, ndërsa në drejtim të objektivit lëshohen raketa. Menjëherë pas goditjes, në qiell shfaqet një shpërthim i fuqishëm, i ndjekur nga një shtëllungë e dendur tymi dhe mbetjet e dronit të shkatërruar.

Pamjet ofrojnë një pasqyrë të rrallë të operacioneve ajrore të Ukrainës kundër dronëve rusë, të cilët përdoren në sulmet ndaj qyteteve dhe infrastrukturës së vendit.

Dronët Geran-4 me motor reaktiv përbëjnë një kërcënim më të madh për mbrojtjen ajrore ukrainase krahasuar me modelet më të vjetra, për shkak të shpejtësisë së tyre më të lartë.

Ndërsa dronët Shahed-136, të njohur në ushtrinë ruse si Geran-2, përdorin motorë me piston dhe fluturojnë me shpejtësi prej rreth 180 deri në 200 kilometra në orë, versionet e reja me motor reaktiv mund të arrijnë shpejtësi mbi 500 kilometra në orë.

Kjo ua zvogëlon ndjeshëm kohën e reagimit forcave ukrainase, duke e bërë më të vështirë interceptimin e tyre nga toka. Grupet e lëvizshme të pajisura me mitralozë të rëndë, të cilat janë përdorur me sukses kundër dronëve më të ngadalshëm, kanë më pak mundësi për t’i neutralizuar këto objektiva.

Përballë këtij kërcënimi, Ukraina duhet të përdorë avionë luftarakë, si MiG-29 dhe F-16, ose raketa të kushtueshme të sistemeve perëndimore të mbrojtjes ajrore.

Përdorimi i këtyre mjeteve për rrëzimin e dronëve paraqet një sfidë edhe për shkak të kostos dhe furnizimeve të kufizuara me municione. Kështu, përhapja e dronëve me motor reaktiv po e ndërlikon më tej përpjekjen e Ukrainës për të mbrojtur hapësirën e saj ajrore. /ABC24.AL/