Merr jetë “Pasqyrë Albania”/ Leka: Nisma e Ramës për të respektuar protestën, por Pasqyra të jetë cilësore, jo si valë deti. Protestuesit, “punë me pagesë”

Qeveria lançoi këtë të shtunë platformën më të re të komunikimit me qytetarët, të quajtur “Flamingo Mirror”. Pjesë e “Pasqyrës Albania”, ajo është një model i ri i transparencës qeveritare përballë shqiptarëve.

Qytetarët e interesuar do të kërkojnë dhe gjejnë informacion me fakte dhe dokumente zyrtare për vendimmarrje dhe projekte të rëndësishme publike. E para që publikohet është dosja e Sazan-Zvërnecit, që do të pasohet nga dosja “Kayo”.

Analisti Martin Leka, i ftuar në “Ora e Njëmbëdhjetë” me Erisa Koxhaj në ABC News theksoi se me këtë hap kryeministri duket se ka reflektuar sadopak për protestën e qytetarëve, e cila vijon prej muajsh para zyrës së tij.

Ai theksoi se në thelb kjo është pozitive dhe i shërben demokracisë në Shqipëri.

Sipas Lekës, nisma është pozitivë, por gjithsesi shtoi se i lind e drejta çdo qytetari që ta shikojë me mosbesim deri sa realizohet transparenca e plotë për çështjet e ndryshme.

“Kryeministri Edi Rama ka mundur sadopak që të reflektojë për atë që ndodh prej mbi tre muajsh para zyrës së tij, siç është protesta. Kjo është gjëja më e mirë që i ndodh demokracisë në Shqipëri. Fakti nëse Edi Rama, ka reflektuar realisht mbi protestën. Nëse realizohet transparenca, do jetë një risi dhe një revolucion i gjithë këtyre kohëve”, tha ai. Por nuk dimë, theksoi ai, nëse kjo është një pasqyrë cilësore apo pasqyrë si valë deti e uzinës së Kavajës.

Martin Leka u ndal në projektin e rrugës Milot-Balldren si një ndjeshmëri personale, projekt i cili sipas tij është tejet i fryrë krahasuar jo vetëm me kostot e rrugëve evropiane, por edhe me rruget tona. “Paguajmë taksë rruge për 20 km sapo kalon Rinasin, do paguajmë sërish sapo shkojmë në Milot, më pas sapo kalojmë Balldrenin dhe i bie të kushtojë taksa e rrugës shumë më tepër se karburanti gjer ne Shkodër.

Ai theksoi se pas protestës qëndrojnë njerëz anonimë. Sipas analistit, personat që dalin në shesh janë “protestues me pagesë”, që nuk i sjellin asgjë të mirë Shqipërisë, nisur edhe nga kauzat që përpiqen t’i mbrojnë.

“Protesta që kërkon përmbysjen e një klase politike, dmth mazhorancës, po ashtu dhe të opozitës, sipas kësaj logjike i bie ta lëmë Shqipërinë në duart e disa anonimëve, që nuk janë gjë tjetër, më vjen keq ta them, por thjesht disa rrogëtarë me punë të pjesshme, që në CV e tyre, punën e parë në jetë do ta kene “protestues me pagesë”. Protestuesit me pagesë nuk sjellin asgjë. Të tilla kërkesa i ka artikuluar me kohë Sali Berisha dhe opozita e tij.”, tha ai.