“Me dukej sikur kishte San Marino më shumë kualitet se ne”, Gjimshiti habitet: Nuk mbaj mend ndeshje të tillë në karrierën time, nuk u duk fare diferenca

Shqipëria siguroi fitoren e tretë në grup pas suksesit 2-1 ndaj San Marinos. Kuqezinjtë morën tri pikë me shumë vështirësi në një sfidë që pritej më e lehtë.

Kristjan Asllani zhbllokoi rezultatin në minutën e 10-të me një ekzekutim spektakolar. Goli i hershëm dha idenë se takimi do të shkonte drejt një fitoreje të thellë. Në fushë ndodhi e kundërta.

San Marino reagoi dhe befasoi kuqezinjtë në minutën e 66-të. Lazari gjeti rrjetën dhe barazoi shifrat në 1-1. Pas këtij momenti Shqipëria u hodh e gjitha në sulm për të kërkuar fitoren.

Goli vendimtar erdhi vetëm në kohën shtesë. Ardian Ismajli fitoi penallti në minutat e fundit. Kristjan Asllani u tregua i saktë nga pika e bardhë dhe vulosi rezultatin 2-1.

Me këtë sukses kombëtarja rimerr vendin e parë në renditje. Kuqezinjtë kanë grumbulluar 9 pikë në total deri tani. Pas ndeshjes lojtarët dhe trajneri folën për “TV Klan”.

Kapiteni Berat Gjimshiti theksoi se duhet të nxirren shumë mësime. “Duhet të nxjerrim shumë mësime. Në karrierën time nuk mbaj mend të kemi pasur një ndeshje ku e mendonim që do të fitonim, por që nuk u duk fare diferenca me San Marinon. Në minutat e fundit me vepra do të kisha treguar që të ikja dhe unë përpara. Por rreziku ishte se mund të shënonin golin e dytë. Mesfusha ishte bosh. Fitonin çdo duel. Më dukej sikur kishin ata më shumë kualitet se sa ne me kombinimet që po bënin”, tha ai.

Elseid Hysaj foli për mungesën e konkretizimit. “Vuan Shqipëria sepse nuk shënon ato raste që ka. Po t’i shfrytëzonim do të kishim fituar 3-0 që në pjesë të parë. San Marino ishte shumë poshtë dhe nuk po na linte hapësira për të sulmuar me shpejtësi. Por edhe disa lojtarë i kam parë pak të lodhur. Nuk ishte ndeshje e dobët. Unë kisha besim në fushë se do të fitonim 2-0 apo 3-0. Por kur po qendronim 1-0 pata pak frikë, sepse nga eksperienca e di që mjafton një moment dhe të ndëshkon kundërshtari. Por le të falenderojmë fatin që fituam penalltinë në fund dhe fituam”, u shpreh mbrojtësi.

Nga ana tjetër Maran pranoi paraqitjen jo të mirë. “Sigurisht që nuk bëmë një ndeshje të mirë. Por në fund arritëm të merrnim tre pikët. Krijuam shumë mundësi në pjesën e parë, por nuk i shfrytëzuam dot. Ulëm ritmin në pjesën e dytë. Menduam se kjo ndeshje ishte e fituar. Por në fakt duhet ta kishim mbyllur ndeshjen që në pjesën e parë. Ndonjëherë ndaj këtyre ekipeve ulet edhe përqendrimi. E kishim në kontroll dhe mjaftonte momenti për të mbyllur ndeshjen. Muçi nuk mund të vazhdonte ndeshjen, pasi kishte një dhimbje në pjesën e kofshës. Nëse llogarisim edhe ndeshjen e Finlandës, mund ta kishim mbyllur këtë ndeshje me 12 pikë”, deklaroi ai.