Mbi 6 miliardë dollarë kontrata shtetërore për kompanitë ku kanë investuar djemtë e Trumpit

Mbi 6 miliardë dollarë kontrata shtetërore për kompanitë ku kanë investuar djemtë e Trumpit

Biznese të lidhura me familjen Trump kanë përfituar më shumë se 6 miliardë dollarë nga qeveria federale e Shteteve të Bashkuara.

Sipas një analize të ABC News, bëhet fjalë për kompani të sektorëve të mbrojtjes dhe teknologjisë ku kanë investuar dy djemtë e presidentit Donald Trump, Donald Trump Jr. dhe Eric Trump. Shifra kalon 6 miliardë dollarë. Disa prej tyre kanë marrë tashmë fonde të drejtpërdrejta, ndërsa të tjera kanë premtime kontraktuale.

Rasti më i fundit është Anduril. Fondi investues 1789 Capital, i lidhur me Donald Trump Jr., zotëron një paketë të konsiderueshme aksionesh atje. Administrata Trump njoftoi se Marina amerikane do të mbështesë me 2.9 miliardë dollarë ndërtimin e fabrikës së re të Anduril në Maryland për prodhimin e nëndetëseve.

Anduril nuk është e vetmja. Pentagoni ka lidhur kontrata edhe me disa kompani të tjera ku kanë investuar anëtarë të familjes Trump. Në këtë grup bëjnë pjesë Powerus, Vulcan Elements, Firehawk Aerospace, PsiQuantum, Hadrian dhe Foundation Future Industries.

Analiza evidenton se fondet dhe angazhimet kontraktuale janë dhënë pasi vëllezërit Trump kishin kryer investimet e tyre. Kjo kronologji ka shtuar dyshimet për konflikt të mundshëm interesi.

Demokratët në Kongres kanë kërkuar ndërhyrjen e inspektorit të përgjithshëm të Pentagonit. Ata kërkojnë hetim për mënyrën e prokurimeve dhe ndarjes së kontratave.

Nga ana tjetër, një zëdhënës i Donald Trump Jr. dhe Eric Trump i ka hedhur poshtë akuzat. Sipas tij, dy vëllezërit nuk kanë asnjë rol në vendimmarrjen e qeverisë për prokurimet publike. Nuk ka shkelje, deklaroi ai.

Çështja po merr vëmendje të shtuar për shkak të shumës kolosale dhe lidhjeve financiare mes përfituesve dhe rrethit të afërt të presidentit amerikan. /ABC24.AL/