Mbi 30 plumba drejt makinës së parkuar në Mat, gjendet i djegur automjeti dhe dy kallashnikovët e autorëve

Policia e Matit po heton një sulm me armë zjarri që ndodhi në mbrëmjen e së shtunës. Ngjarja u regjistruar në fshatin Urakë të njësisë Rukaj. Autorë ende të panjohur kanë qëlluar me mbi 30 plumba ndaj një automjeti "Audi" të parkuar në oborrin e një banese. Makina ishte në pronësi të shtetases S. Ll., bashkëshortja e A. Ll. Për fat të mirë, nuk pati persona të lënduar. Dëmet u vlerësuan vetëm materiale në mjet.

Menjëherë pas njoftimit, blutë ngritën pika kontrolli në zonë për kapjen e përgjegjësve. Gjatë kërkimeve, rreth dy kilometra larg vendit të ngjarjes, në aksin Rrëshen-Burrel, u gjet një automjet tip "Golf V" i tërësisht i djegur. Sipas policisë, dyshimet janë se kjo makinë u përdor nga sulmuesit për t'u larguar nga vendi i krimit.

Brenda mjetit të djegur u identifikuan dy armë automatike të tipit kallashnikov. Ato kishin pësuar dëmtime të rënda nga flakët. U sekuestruan nga grupi hetimor si prova materiale për zbardhjen e rastit. Gjithashtu, nga verifikimet u mësua se "Golf V" ishte shpallur në kërkim nga Drejtoria Vendore e Policisë në Elbasan që prej 31 korrikut 2025. Sipas denoncimit, makina ishte vjedhur nga një banor i Përrenjasit.

Hetuesit po vijojnë kontrollet intensive në territor për të identifikuar autorët. U vendosën bashkëpunime me Drejtoritë Vendore të Policisë në Tiranë, Lezhë dhe Kukës për të mbledhur informacione dhe prova të reja.