Marrëveshjet me Gjermaninë, Balla: Investimet në konvikte, mbështetje konkrete për studentët

Investimet për konviktet studentore dhe programi për klimën, të parashikuara në marrëveshjet me Gjermaninë, ishin në fokus të diskutimit të Taulant Ballës në Komisionin për Evropën dhe Punët e Jashtme.

Kryetari i Grupit Parlamentar të Partisë Socialiste foli gjatë shqyrtimit të këtyre akteve ndërkombëtare.

Programi i investimeve synon ndërhyrje për efiçiencën energjetike në 19 konvikte ekzistuese dhe ngritjen e së paku tre godinave të reja. Qëllimi është përmirësimi i kushteve të akomodimit dhe ngritja e standardit të jetesës për studentët.

“Dua të theksoj që në fazat e para dhe të treta janë rehabilituar 5 konvikte, ndërsa programi parashikon rehabilitimin energjetik të 19 konvikteve ekzistuese dhe ndërtimin e të paktën 3 konvikteve të reja. Kjo është një marrëveshje që u iniciua në kuadër të Paktit për Universitetin dhe vazhdojmë t’i qëndrojmë rigorozë angazhimeve që ka marrë qeveria”, u shpreh Balla.

Për shkak të karakterit ndërkombëtar të marrëveshjeve, procesi kërkon edhe miratimin e Kuvendit përmes ratifikimit. Ky parim u theksua nga Balla gjatë diskutimit në komision.

Ai iu referua edhe gjendjes aktuale të konvikteve. Disa prej tyre, sidomos në Qendrën Studentore nr. 1, ofrojnë tashmë kushte të mira. Objektivi, sipas tij, është shtrirja e të njëjtës cilësi në çdo konvikt studentor.

Kreu i grupit parlamentar socialist vlerësoi kontributin e Republikës Federale të Gjermanisë në këtë nismë. Mbështetja vjen përmes Bankës Gjermane për Zhvillim (KfW) dhe institucioneve të tjera financiare partnere, për realizimin e këtyre investimeve.