Mali i Zi ndalon mishin e skaduar nga Brazili për në Kosovë

Mali i Zi ka ndaluar futjen në territorin e tij të tre kontejnerëve me mish të skaduar, të cilët ishin në tranzit për në Kosovë. Lajmin e bën të ditur Dogana malazeze, sipas të cilës inspektorët zbuluan një tentativë për manipulimin e datave të skadencës.

Kontejnerët mbajnë mish viçi të ngrirë, me prejardhje nga Brazili, dhe kishin si destinacion një blerës në Kosovë. Gjatë kontrollit u vu re se kontejnerët ishin hequr nga mbikëqyrja doganore pa lejen e duhur.

Më tej, hetimet çuan në një objekt frigorifer në Portin e Tivarit (Bar). Aty u konstatua se stafi, i cili punonte për një kompani kosovare, po përdorte mjete për të modifikuar etiketat. “Ata hiqnin deklaracionet origjinale, të cilat tregonin se afati i përdorimit të mishit të ngrirë kishte skaduar, dhe vendosnin deklaracione të reja e të falsifikuara, që tregonin një datë të re dhe të ndryshuar skadimi,” shpjegon njoftimi zyrtar.

Pas këtij rasti, Dogana ka informuar menjëherë edhe Administratën për Sigurinë e Ushqimit, Çështjet Veterinare dhe Fitosanitare, si edhe Policinë e Malit të Zi. Të dyja agjencitë tashmë janë të përfshira në procedurat e mëtejshme, secila brenda kompetencave të veta.

Një hetim më i gjerë është duke u zhvilluar. Sipas të dhënave, disa biznese të përpunimit të mishit në Mal të Zi furnizohen pikërisht nga subjekti kosovar i përfshirë në këtë çështje. Autoritetet po punojnë intensivisht për të zbardhur të gjitha faktet dhe për të përcaktuar nëse malli i skaduar ka mbërritur diku tjetër.

“Pasi autoritetet kompetente të përfundojnë procedurat e tyre, publiku do të informohet në mënyrë të detajuar dhe në kohën e duhur lidhur me faktet e konstatuara dhe masat e marra”, përfundon njoftimi zyrtar.