Lufta, Rusia dhe Ukraina shkëmbejnë nga 270 të burgosur pas negociatave me amerikanët!

Rusia dhe Ukraina liruan secila nga 270 të burgosur lufte në shkëmbimin më të fundit mes dy vendeve. Shkëmbimi u zhvillua pas negociatave me ndërmjetësues amerikanë në fillim të kësaj jave.

Pjesa më e madhe e ushtarëve të kthyer kishin mbetur në robëri që prej vitit 2022, kur Rusia nisi pushtimin në shkallë të plotë të Ukrainës.

Presidenti ukrainas bëri me dije se në mesin e të liruarve ndodhen edhe pesë persona që i mbijetuan sulmit në Olenivka. “Midis atyre që po kthehen janë pesë persona që i mbijetuan sulmit terrorist rus në Olenivka në korrik 2022”, njoftoi ai.

Kievi e akuzoi Moskën për krim lufte për goditjen ndaj Olenivkës, ku humbën jetën dhjetëra të burgosur. Rusia nga ana e saj pretendon se kampin e granatoi vetë Ukraina.

Yana Lantratova, komisionerja ruse për të drejtat e njeriut, deklaroi se Ukraina i dorëzoi Rusisë shtatë civilë. Sipas saj, ata tashmë mund të ribashkohen me familjet e tyre.

“Disa njerëz nuk ishin në gjendje të ktheheshin te të dashurit e tyre për një kohë të gjatë për shkak të problemeve me dokumentet e tyre. Të tjerë e gjetën veten larg familjeve të tyre, pa mbështetje ose para për të mbijetuar”, tha Lantratova.

Ministria e Mbrojtjes e Rusisë njoftoi në Telegram se ushtarakët e liruar ndodhen në Bjellorusi. Ata do të transportohen drejt Rusisë pasi të kenë marrë ndihmë psikologjike dhe mjekësore.

Ministria publikoi gjithashtu një video ku ushtarët rusë shfaqen duke buzëqeshur, teksa hipin në autobus.

Që prej fillimit të luftës në shkallë të plotë janë shkëmbyer mijëra të burgosur. Ky mbetet një nga kanalet e pakta ku Moska dhe Kievi kanë ruajtur kontakte, pavarësisht konfliktit.

Shkëmbimi i fundit i gjerë u zhvillua më 19 gusht. Atëherë u kthyen 103 ukrainas nga robëria ruse, ndërsa dhjetë të tjerë u liruan më vonë gjatë atij muaji.