Liga e Kombeve/ Zidan e nis epokën e ‘gjelave’ me fitore, Mançini me humbje! Belgjika i nxjerr ‘bojën’ Italisë, Franca dhe Mbappe mposhtin turqit

Debutime me shije të kundërta solli raundi i parë i Ligës së Kombeve.

Në Kocaeli, Franca e Zinedine Zidane fitoi minimalisht 0-1 ndaj Turqisë. Ishte ndeshja e parë për "Les Bleus" në këtë edicion të kompeticionit.

Protagonist u bë Kylian Mbappé. Kapiteni francez vendosi sfidën me golin e vetëm në minutën 54.

Me këtë triumf, epoka e re në krye të Francës nisi me këmbën e duhur. Suksesi erdhi në një transfertë të vështirë, e mbyllur me forcën e pjesës së dytë.

Përballja pati ngarkesë simbolike për Zidane. Bëhej fjalë për debutimin e tij zyrtar me kombëtaren, pas mbylljes së ciklit 14-vjeçar të Didier Deschamps.

Tekniku rikthehet kështu te futbolli i përfaqësueseve, pasi më parë kishte drejtuar vetëm Real Madridin. Në krye të klubit spanjoll ai ngriti tri herë trofeun e Champions League.

Krejt ndryshe shkuan gjërat në Grupin 1 të Ligës A. Italia u mund 0-2 brenda në shtëpi nga Belgjika, në duelin e vlefshëm për xhiron e parë të UEFA Nations League.

Takimi shënoi rikthimin e Roberto Mancinit në stolin e të kaltërve, por mbrëmja i takoi Mark van Bommelit. Holandezi debutoi në krye të "Djajve të Kuq" dhe mori menjëherë një fitore me peshë.

Miqtë e nisën me personalitet dhe zhbllokuan rezultatin që në minutën 20. Mika Godts dërgoi topin në rrjetë për 0-1. Mancini tentoi të korrigjonte rrjedhën me lëvizje taktike, pa efekt.

Goditja përfundimtare erdhi pas pushimit. Në minutën 69, Dodi Lukebakio dyfishoi shifrat dhe vulosi rezultatin 0-2.

Nisje ideale për erën Van Bommel te Belgjika. Për Mancinin, mbetet shumë punë për të rregulluar prapavijën dhe finalizimin para ndeshjeve të ardhshme.