Lautaro e pranon: Po, më kërkoi Barcelona, por nuk dua të largohem nga Interi!

Sulmuesi argjentinas i Interit, Lautaro Martinez, ka folur hapur për të ardhmen e tij, duke konfirmuar interesimin e Barcelonës.

Ai pranoi se katalanasit e kanë kontaktuar. Megjithatë, mesazhi i tij ishte i qartë: planet e tij lidhen vetëm me klubin zikaltër. “Kur vijnë oferta dhe telefonata të tilla, është gjithmonë një kënaqësi, sepse do të thotë se po punon për të qëndruar në majë. Thashethemet ishin të vërteta, por unë i kam shumë të qarta idetë dhe objektivat e mi”, u shpreh 26-vjeçari.

Martinez nënvizoi edhe më tej lidhjen e fortë me fanellën dhe mjedisin ku ndodhet. “Doja të qëndroja këtu me shokët e mi të ekipit dhe me këtë bazë tifozësh të mrekullueshme. Do të qëndroja përgjithmonë dhe, për sa kohë që ata më duan, do të jem këtu”.