Ky është kolltuku që po e zëvendëson modelin klasik: Rehati maksimale, pa zënë shumë hapësirë

Modeli i ri i kolltukut që po lë pas klasiken: komfort i lartë pa zënë vend

Dizajni i brendshëm po kalon një kthesë të rëndësishme. Një nga mobiliet më emblematike të dhomës së ndenjes, e lidhur prej dekadash me idenë e rehatisë, po humbet gradualisht terren.

Për ata që planifikojnë të rifreskojnë banesën, profesionistët e fushës kanë një sugjerim të qartë. Kolltukët tradicionalë, të rëndë dhe me volum të madh, me krahë të gjerë e të mbushur, nuk janë më preferenca kryesore.

Periudha kur sallonet ekspozonin kryesisht kolltukë të thellë, masivë dhe të vështirë për t'u zhvendosur, po shkon drejt fundit. Në banesat bashkëkohore, krahas divanit, po shfaqet gjithnjë e më dendur një tipologji tjetër. Ajo premton ndjesi të lartë rehatie, pa e ngarkuar pamjen e ambientit.

Bëhet fjalë për kolltukë me linja skulpturore dhe forma organike, pa mbështetëse anësore. Njihen si modelet tip “pillow”. Krah tyre po kërkohen shumë edhe variantet kompakte rrotulluese me bazë të padukshme. Të dyja janë kthyer në trendet më të pëlqyera të momentit.

Lamtumirë krahëve voluminozë

Kolltuku klasik dallohej nga mbështetëset e gjera dhe të veshura për krahët. Ato mund të zinin një pjesë jo të vogël të gjerësisë së përgjithshme.

Modelet e reja e heqin këtë strukturë të rëndë. Ato ruajnë thuajse të njëjtin vend ndenjeje, por me dimensione të jashtme dukshëm më kompakte, transmeton ABC24.AL.

Funksion i fshehur, pamje minimaliste

Nga jashtë, kolltukët rrotullues të kohëve të fundit duken të thjeshtë dhe elegantë. Brenda tyre fshihet një mekanizëm që lejon rrotullimin deri në 360 gradë.

Mjafton një lëvizje e lehtë e trupit për t'u kthyer nga televizori te miqtë në dhomë. Nuk ka nevojë të tërhiqet apo të spostohet një mobilie e rëndë mbi qilim.

Ndjesia e “pluskimit” në dhomë

Ndryshe nga modelet e vjetra që mbyllnin vizualisht një cep të sallonit me masivitetin e tyre, propozimet e reja ndjekin dy drejtime. Ose pozicionohen shumë ulët, si jastëkë të mëdhenj e të butë, ose ngrihen mbi këmbë të holla metalike.

Në të dyja rastet ambienti duket më i ajrosur dhe më i lehtë. Variantet e ulëta lënë më shumë hapësirë të lirë në pjesën e sipërme të dhomës. Këmbët e holla, nga ana tjetër, lejojnë dritën të qarkullojë lirshëm poshtë kolltukut.

Prakticiteti në qendër

Përveç përshtatjes së mirë në apartamente me sipërfaqe të kufizuar, ku çdo metër katror vlen, këto zgjidhje janë më të leverdisshme edhe për higjienën.

Struktura më e lehtë dhe boshllëku poshtë tyre ndihmojnë pastrimin. Fshesat robotike dhe pajisjet për larjen e dyshemesë lëvizin më kollaj përreth dhe nën to.

Interesi i blerësve po rritet ndjeshëm. Në pikat e shitjes kërkohen gjithnjë e më shumë kolltukë që duken si objekte bashkëkohore dizajni dhe, njëkohësisht, garantojnë rehati të lartë. Pa strukturat e rënda e voluminoze me të cilat u mësuam ndër vite. /ABC24.AL/