Kufizime mediave, dosjet dhe përgjimet publikohen pasi t’i lejojë Gjykata

Publikimi i materialeve nga dosjet hetimore në media do të kufizohet ndjeshëm. Ndryshimet e reja synojnë të mbyllin shpërndarjen e pakontrolluar të akteve.

Rregullat e parashikuara në Kodin e Procedurës Penale nuk prekin vetëm prokurorët, gjyqtarët dhe avokatët. Ndalimi për qarkullimin e dokumenteve shtrihet edhe te redaksitë. Dhe kjo nuk vlen vetëm për rastet që lidhen me sekretin hetimor.

Një kufizim i posaçëm pritet edhe për përgjimet telefonike. Aty hapësira për botim ngushtohet më tej.

Për këtë pikë Ministria e Drejtësisë është e prerë. Sipas saj, “Publikimi, qoftë edhe i pjesshëm, i përmbajtjes së përgjimeve telefonike është gjithmonë i ndaluar, me përjashtim të pjesës së transkriptimit që citohet në arsyetimin e një vendimi ose që përdoret gjatë gjykimit”.

Po nëse gazetari e disponon tashmë dosjen? Edhe atëherë botimi nuk mund të bëhet pa miratim paraprak.

Në këtë rast, sqaron Ministria e Drejtësisë, “Në rastin e të tretëve dhe veçanërisht gazetarëve, mediave, që zotërojnë tashmë të dhëna që bien në regjimin e këtij neni, ata mund t’i kërkojnë gjykatës kompetente të shkallës së parë autorizimin për publikimin e të dhënave”, informon A2CNN.

Ndërkohë debati mes palëve në proces dhe gazetarëve ka përfshirë edhe filmimin e seancave gjyqësore. Kërkesat për kamera në sallë janë shtuar sidomos për dosjet më të ndjeshme.

Tani edhe kjo çështje gjen rregullim në Kodin procedural penal.

Ministria e Drejtësisë thekson se “Kur kërkohet prej të pandehurit, viktimës ose prej mbrojtësve të tyre, gjykata mund të autorizojë transmetimin e drejtpërdrejtë online të seancës, pasi ka dëgjuar palët dhe kur vlerëson se nuk cenohen të drejtat e të tretëve që nuk janë palë në proces, se të drejtat e viktimave janë të mbrojtura në mënyrë të përshtatshme dhe garantohet zhvillimi i qetë i debatit gjyqësor”.

Amendamentet parashikojnë edhe pasojat për shkelësit. Transmetimi i paligjshëm konsiderohet shkak për masa administrative ose disiplinore ndaj subjektit transmetues.