Kryetari i New Yorkut, Mamdani: Netanyahu është arkitekt i një gjenocidi të tmerrshëm

Kryebashkiaku i New York-ut sulmon Netanyahun: "Arkitekt i një gjenocidi të tmerrshëm" në Gaza

Kryebashkiaku i New York-ut, Zohran Mamdani, ka drejtuar kritika të forta ndaj kryeministrit izraelit Benjamin Netanyahu për luftën në Gaza. Ai deklaroi se komuniteti hebre i qytetit nuk mund të fajësohet për vendimet e qeverisë në Tel Aviv.

Përgjegjësinë, theksoi ai, e mbajnë pikërisht ata që i marrin vendimet, duke përfshirë kryeministrin dhe ekzekutivin izraelit. "Një nga gjërat për të cilat jam krenar është se jetojmë në qytetin me popullsinë më të madhe hebraike në Shtetet e Bashkuara", tha Mamdani.

Mamdani ngriti edhe rolin e Shteteve të Bashkuara si financuese e Izraelit. Ai tha se amerikanët duhet të reflektojnë mbi miliardat e dollarëve të dërguara për armatime.

Netanyahun e cilësoi si "arkitektin e një gjenocidi të tmerrshëm" ndaj palestinezëve. Bëhet fjalë për një akuzë të tij. Izraeli i ka hedhur poshtë pretendimet për gjenocid. Lufta në Gaza, sipas Tel Avivit, është përgjigje ndaj sulmit të Hamasit më 7 tetor 2023.

Mamdani u shpreh se dhuna në Rripin e Gazës nuk është ndalur, edhe pse flitet për armëpushim. Si shembull ai solli vrasjen e një 11-vjeçari palestinez në një zonë të shpallur të sigurt. Rastin e përdori për të forcuar kritikat ndaj qeverisë izraelite.

Deklaratat u bënë në mes të përplasjes publike mes tij dhe Netanyahut. Tensioni është shtuar gjatë qëndrimit të kryeministrit izraelit në New York. Ai ndodhet aty për punimet e Asamblesë së Përgjithshme të Kombeve të Bashkuara.