Kroacia e “kushtëzoi me 2.4 miliardë euro” anëtarësimin e Malit të Zi, reagon presidenti malazez

Presidenti i Malit të Zi e quan joreale kërkesën 2.4 miliardë euro të Kroacisë dhe kërkon që procesi i anëtarësimit në BE të mos kushtëzohet

Kërkesa e Kroacisë për kthimin e pasurive me vlerë mbi 2.7 miliardë dollarë (2.4 miliardë euro) nuk qëndron. Kështu e ka vlerësuar presidenti i Malit të Zi, Jakov Milatoviq. Ai theksoi se çështjet dypalëshe nuk duhet të kthehen në kusht për rrugëtimin evropian të vendit.

Deklaratat u bënë gjatë një vizite në Berane. Aty kreu i shtetit foli për marrëdhëniet me Zagrebin. Ai tha se raportet duhet të mbeten të mira. Të dy vendet, sipas tij, duhet të fokusohen tek ajo që i bashkon.

“Kroacia është partnerja dhe mikja jonë. Le të përqendrohemi më shumë te gjërat që na bashkojnë dhe më pak te ato që na kanë ndarë në të kaluarën”, tha ai, shkruan vijesti.me.

Milatoviq shtoi se përfaqësues të institucioneve evropiane kanë theksuar vazhdimisht të njëjtin qëndrim. Rruga e Malit të Zi drejt BE-së nuk duhet të lidhet me çështjet e pazgjidhura bilaterale.

Në praktikë, tabloja paraqitet më komplekse. Presidenti malazez përmendi Kapitullin 31 të negociatave me BE-në. Ai është teknikisht i gatshëm për t'u mbyllur. Por finalizimi nuk ka ndodhur ende. Arsyeja lidhet me raportet me Kroacinë.

Kreu i shtetit pret një zhvillim brenda afateve të ardhshme. Mali i Zi mund të nënshkruajë Traktatin e Anëtarësimit me Bashkimin Evropian deri në verën e vitit të ardhshëm. Pas kësaj do të hapet faza e ratifikimit në shtetet anëtare.

“Integrimi evropian ka dimensionin e tij teknik dhe politik”, tha Milatoviq. Ai vuri theksin te nevoja për dialog të vazhdueshëm me anëtarët e BE-së dhe për angazhim diplomatik aktiv nga Podgorica.

Nga ana tjetër, ministri i Jashtëm kroat Gordan Grliq Radman deklaroi se anija “Jadran” nuk është pasuria e vetme që kërkohet. Sipas tij, Zagrebi ka në dispozicion dokumente. Ato dëshmojnë se bëhet fjalë për pasuri që kalon vlerën e 2.4 miliardë eurove. /ABC24.AL/