Komiteti ushtarak i NATO-s rikthehet në Kiev pas tetë vitesh

Pas tetë vitesh shkëputje, Komiteti Ushtarak i NATO-s u rikthye në Kiev për një vizitë zyrtare.

Në delegacion merrnin pjesë përfaqësues ushtarakë nga 32 vendet anëtare të Aleancës. Grupi i nivelit të lartë, i kryesuar nga admirali Giuseppe Cavo Dragone, mbërriti në kryeqytetin ukrainas më 6 tetor. Vizita u realizua edhe pse rreziku nga sulmet ruse mbetet i lartë.

Kreu i Komitetit Ushtarak e cilësoi rikthimin si një moment domethënës. Ai deklaroi: “Pas një ndërprerjeje tetëvjeçare, Komiteti Ushtarak i NATO-s po kthehet në Kiev për një vizitë zyrtare. Edhe pse nuk kemi qenë fizikisht të pranishëm këtu, Ukraina ka qenë gjithmonë në mendimet, diskutimet dhe vendimet tona”.

Cavo Dragone theksoi se Aleanca qëndron e bashkuar përballë kërcënimeve që prekin sigurinë e saj. Sipas tij, Rusia nuk do të arrijë të thyejë unitetin e anëtarëve. Ai përmendi sabotimet, sulmet kibernetike dhe shkeljet e hapësirës ajrore si mjete që nuk do të dobësojnë kohezionin e NATO-s.

Vizita zhvillohet në një moment kur Ukraina vijon të përballen me agresionin rus. Ndërkohë NATO po thellon bashkëpunimin ushtarak dhe po rrit mbështetjen për Kievin.

Shumë prej shteteve anëtare të Aleancës po vazhdojnë ndihmën ndaj Ukrainës për të zmbrapsur pushtimin rus.