Komisioneri McGrath pas takimit me Ramën: Shqipëria e ka vendin në BE, është në krye të procesit të anëtarësimit

Shqipëria po prin në rrugëtimin drejt Bashkimit Evropian. Këtë vlerësim e dha komisioneri evropian për Demokracinë, Drejtësinë, Sundimin e Ligjit dhe Konsumatorët, Michael McGrath.

Pas bisedës me kryeministrin Edi Rama, ai ndau një mesazh në rrjetet sociale. Ai çmoi hapat e hedhur deri tani. Njëkohësisht kërkoi që reformat kryesore të vijojnë me të njëjtin intensitet.

Në qëndrimin e tij, zyrtari i Brukselit e vendosi drejtësinë në qendër. Sipas tij, ajo mbetet garancia për të konsoliduar arritjet e deritanishme.

“Isha shumë i kënaqur që u takova sot me Kryeministrin e Shqipërisë dhe artistin me përvojë, Edi Rama, për të diskutuar udhëtimin e anëtarësimit të Shqipërisë në BE. Ishte një mundësi për të përgëzuar Kryeministrin dhe qeverinë e tij për progresin e rëndësishëm të arritur deri më tani. Shqipëria i përket BE-së dhe është një nga vendet në krye të procesit të anëtarësimit,” u shpreh McGrath.

Ai pranoi se objektivi final duket pranë. Megjithatë, në terren ka ende punë. Vetëm zbatimi i plotë siguron ndryshime të qëndrueshme dhe të pakthyeshme.

Brukseli do të qëndrojë krah Tiranës. Mbështetja do të vijojë në çdo fazë të negociatave, theksoi komisioneri.

“Diskutimi ynë sot u përqendrua në zbatimin e reformave të rëndësishme në drejtësi dhe sundimin e ligjit — spiranca politike e procesit të anëtarësimit. Ekziston një histori e fortë progresi dhe një ambicie e qartë. Tani, ky momentum duhet të ruhet për të dhënë rezultate të pakthyeshme,” përfundoi mesazhin e tij Komisioneri McGrath.