Kërcënoi një grua me foto nudo dhe i mori 15 mijë euro, shqiptari përfundon në polici në Rodos

Një 28-vjeçar me origjinë shqiptare është proceduar penalisht në Rodos pas kallëzimit të një gruaje 44-vjeçare me origjinë polake. Ajo pretendon se i riu i ka marrë më shumë se 15 mijë euro përmes mashtrimit dhe më pas e ka kërcënuar me publikimin e materialeve intime.

Sipas mediave greke, çështja po hetohet nga Nëndrejtoria e Hetimit dhe Ndjekjes Penale të Krimit në Rodos, e cila u vu në lëvizje pas denoncimit të gruas.

Në dëshminë e saj, 44-vjeçarja ka deklaruar se 28-vjeçari e bindi të kryente transferta parash me këste, duke i paraqitur të dhëna të rreme. Pagesat, sipas saj, janë kryer në periudhën tetor 2024 - nëntor 2025 dhe kapin vlerën totale prej 15.417 eurosh. Kur e kuptoi se informacionet e marra nuk përputheshin me realitetin, gruaja i kërkoi të riut t'ia kthente shumën.

Pikërisht atëherë, sipas kallëzimit, situata ka marrë një rrjedhë tjetër. I riu dyshohet se e ka kërcënuar gruan se do t'ua përcillte të afërmve foto nudo të saj që pretendohet se i mbante. E frikësuar nga presioni, 44-vjeçarja iu drejtua policisë dhe denoncoi mashtrimin financiar bashkë me kërcënimet e pretenduara.

Pas denoncimit, policia e Rodosit e ka proceduar penalisht 28-vjeçarin për mashtrim, kërcënime dhe pornografi për hakmarrje. Hetimet për rastin vijojnë.