Kek me mollë që përgatitet pa furrë dhe pa mikser: Ju duhen vetëm një vezë dhe dy mollë

Një ëmbëlsirë e butë, aromatike dhe e shijshme, që përgatitet në tigan me përbërësit që zakonisht i keni në shtëpi

Kur në kuzhinë dhe në frigorifer nuk keni shumë përbërës, por ju hahet diçka e ëmbël, kjo recetë e thjeshtë me mollë mund të jetë zgjidhja ideale. Për përgatitjen e saj ju duhen vetëm një vezë, dy mollë dhe disa përbërës të zakonshëm.

Kjo recetë është kthyer në një hit të vërtetë në internet, ndërsa një nga arsyet e popullaritetit të saj është se nuk kërkon as mikser dhe as furrë.

Keku përgatitet drejtpërdrejt në tigan, mbi shporet elektrik, me gaz ose mbi pllakë induksioni, nëse tigani është i përshtatshëm.

Receta që po ju sjellim është nga kanali Arab Sweet, ku videoja ka grumbulluar mbi 33 milionë shikime dhe mijëra komente pozitive.

Përbërësit për kekun e shpejtë me mollë

Për shtresën me mollë:

2 mollë të mëdha

30 g gjalpë

30 g sheqer

kanellë sipas dëshirës

Për brumin:

1 vezë

30 g sheqer

8 g sheqer vaniljeje

30 ml vaj

150 g kos

140 g miell i bardhë

8 g pluhur për pjekje

Mënyra e përgatitjes

1. Përgatitni mollët. Qëroni mollët, pastrojini, pritini përgjysmë dhe hiquani farat. Më pas pritini në feta të holla.

2. Përgatitni brumin. Në një enë rrihni vezën me sheqerin dhe sheqerin e vaniljes. Shtoni vajin dhe përziejini mirë, pastaj hidhni kosin. Në fund shtoni miellin e përzier me pluhurin për pjekje, të cilin mund ta sitni paraprakisht. Përziejini me tel kuzhine derisa të krijohet një masë e lëmuar dhe pa kokrriza.

3. Karamelizoni mollët. Shkrini gjalpin në një tigan, shtoni sheqerin dhe përziejini. Vendosni fetat e mollëve dhe lërini të zbuten në zjarr të ulët për rreth 10 minuta. Sipas dëshirës shtoni kanellë dhe përziejini lehtë.

4. Shtoni brumin. Hidhni masën e përgatitur mbi mollët dhe shpërndajeni me kujdes me një spatul, në mënyrë që t’i mbulojë plotësisht. Mbulojeni tiganin me kapak dhe piqeni kekun në zjarr të ulët për rreth 10 minuta.

5. Kthejeni kekun. Kontrolloni me një kruese dhëmbësh nëse brumi është pjekur. Nëse krueseja del pa brumë të njomë, keku është gati për t’u kthyer. Vendosni mbi tigan një pjatë me madhësi të përshtatshme, kthejeni me kujdes kekun mbi të dhe më pas rrëshqiteni përsëri në tigan, me anën tjetër poshtë.

6. Përfundoni pjekjen. Mbulojeni sërish tiganin dhe lëreni të piqet edhe për rreth pesë minuta, derisa të marrë ngjyrë të artë. Kontrolloni që brumi të jetë pjekur plotësisht edhe në qendër.

Keku mund të shërbehet i ngrohtë ose pasi të jetë ftohur pak. Mollët e zbutura, aroma e kanellës dhe brumi i butë krijojnë një kombinim të shijshëm, ideal për ta shoqëruar me kafe ose çaj.

– YouTube

Ju bëftë mirë!

/ABC24.AL/