Karamuço analizon protestën, zbulon çfarë ndryshoi sot në sjelljen e protestuesve dhe paralajmëron grupin e dhunës!

Karamuço: Protesta e kësaj të shtune ishte më pak e tensionuar, ndërsa policia përdori vetëm topa uji

Eksperti i kriminalistikës, Ervin Karamuço, vlerësoi se demonstrata e kësaj të shtune kishte intensitet më të ulët se ajo e dy javëve më parë. Atëherë u rrezikua edhe jeta e efektivëve të policisë. Sipas tij, Policia e Shtetit u vetëmjaftua gjatë ditës së sotme duke përdorur vetëm topa uji, pa pasur nevojë të angazhonte mjete të tjera për të frenuar turmën agresive.

I ftuar në emisionin “Breaking News”, Karamuço shtoi se Policia ka forcuar kapacitetet e veta, për t’u përballur me sukses çdo veprim të dhunshëm që mund të vijë nga protestuesit.

“Nuk pati përplasje apo intensitet të sulmeve që kemi parë dy javë përpara. Kjo kishte intensitet më të ulët. Policia ishte më e vetëpërmbajtur. Policia është vetëmjaftuar vetëm me topat e ujit. Nga ana e protestuesve ka qenë djegia e koshave dhe goditja me llastiqe. Protestuesit duhet të kuptojnë se pas përplasjeve të mëdha që pati dy javë më përpara, Policia ka sot në dispozicion edhe mjete të tjera të vetëmbrojtjes dhe shpërndarjes së turmave, por dhe mjete për identifikimin dhe ndjekjen e personave keqbërës.”, tha ai.

Sipas Karamuços, grupi i dhunës që shfaqet në çdo protestë duhet ta kuptojë se kjo qasje nuk do t’i dërgojë askund. Sipas tij, rruga e dialogut është strategjia më e mirë për të gjitha palët, pasi dhuna prodhon vetëm dhunë.

“Ka një vetëpërmbajtje edhe nga protestuesit për shkak të masave që ka miratuar shteti shqiptar. Ka një grup aty brenda protestës. Ata persona duhet të vetëpërjashtohen dhe të zgjedhin një rrugë tjetër. Rruga e dialogut është rrugë më e lehtë. Dhuna sjell vetëm dhunë”, tha ai.