Kapet në Tiranë një i shumëkërkuar nga Italia, i dënuar me mbi 21 vite burg, pritet ekstradimi

Bie në pranga në Sauk 40-vjeçari i dënuar në Itali me mbi 21 vjet burg

Policia ka ndaluar në kryeqytet një 40-vjeçar të dënuar rëndë nga drejtësia italiane. Bëhet fjalë për shtetasin Ornado Çeta alias Ceta, banues në Tiranë.

Arrestimi u krye në zonën e Saukut. Në aksion u angazhuan shërbimet operacionale të Sektorit për Kërkimin FAST Albania, pjesë e Drejtorisë së Forcës së Posaçme Operacionale në Departamentin e Policisë Kriminale, në bashkëpunim me Policinë Vendore të Tiranës.

Operacioni është një tjetër fazë e planit të koduar “FAST”. Synimi ishte kapja e tij për ta ekstraduar drejt shtetit fqinj.

Sipas Policisë së Shtetit, 40-vjeçari rezultonte në kërkim ndërkombëtar. Dënimin ndaj tij e kishte dhënë Gjykata e Apelit e Triestes.

Masa e caktuar është 21 vite, 9 muaj dhe 20 ditë heqje lirie. Ai vlerësohet si person me rrezikshmëri të lartë shoqërore.

Në ngarkim të tij rëndojnë disa akuza të rënda. Ai është shpallur fajtor për vjedhje të rënda, mashtrim dhe trafikim të lëndëve narkotike.

Ndërkohë lista e veprave përfshin edhe posedimin e pasurisë me origjinë kriminale. Ai akuzohet po ashtu për plagosje, kanosje, si dhe kundërshtim ndaj punonjësve të policisë.

Nga dënimi i plotë, të arrestuarit i kanë mbetur ende për të vuajtur 20 vite, 6 muaj dhe 14 ditë burg.

Për ekstradimin po punohet mes palëve. Interpol Tirana po bashkëpunon me Interpol Romën për të përfunduar procedurat dhe dërgimin e tij në Itali.