Kamala Harris, sërish kandidate për presidente të SHBA-së?

Guvernatorit të Kalifornisë, Gavin Newsom, nuk e sheh veten në garën presidenciale të vitit 2028 nëse ish-zëvendëspresidentja Kamala Harris vendos të bëjë një përpjekje tjetër për Shtëpinë e Bardhë.

"Nuk do të garoja nëse ajo do të kandidonte", deklaroi Newsom për CNN, ndërsa pranoi se është duke e shqyrtuar mundësinë e tij të kandidimit.

Sipas tij, një garë e mundshme mes dy politikanëve demokratë nga Kalifornia do të ishte një "dhuratë elektorale" për kundërshtarët politikë.

"Do të ishte shkatërrim i garantuar reciprokisht, çka nuk i shërben asnjë qëllimi më të lartë. Nuk ka asnjë përfitim", u shpreh guvernatori.

Newsom pranoi se një mundësi e tillë mund të përdorej si argument, pasi Harris ka kandiduar edhe në vitet 2020 dhe 2024. "Objektivisht, kjo është e vërtetë", tha ai.

Megjithatë, ai theksoi ndarjen e madhe të bazës elektorale dhe rrjeteve mes tyre. "E njoh bazën e saj të mbështetjes, i njoh miqtë e saj. Nuk do t'ua bëja këtë", shtoi Newsom.

Harris ende nuk ka marrë një vendim përfundimtar për vitin 2028. Në korrik, ajo tha se "nuk ka marrë një vendim", por më herët gjatë vitit pranoi se po e shqyrton mundësinë e një kandidimi të tretë.

Mandati i Newsom si guvernator përfundon pas disa muajsh dhe ai ka thënë se do të vendosë për kandidim pas zgjedhjeve afatmesme. Së fundmi, ai vizitoi Karolinën e Jugut, ku në vitin 2028 do të zhvillohen zgjedhjet e para paraprake të demokratëve.