“Kam qenë rebel, por jo i bullizuar”, rrëfimi i Ramës: Në jetë më kanë dhunuar vetëm dy herë, më lanë për të vdekur

Kryeministri Edi Rama i është përgjigjur pyetjeve të gazetares Rudina Xhunga në podcastin “Flasim të Kryeministrit”, ku ka folur për fëmijërinë dhe akuzat politike se ka qenë i bullizuar. Rama ka mohuar të ketë qenë ndonjëherë i bullizuar, duke treguar në vend të kësaj dy episode dhune në jetën e tij.

Ai ka shpjeguar se karakteri i tij rebel dhe refuzimi i kufijve ishin tipare të pranishme që në moshë të re. “Nëse do të kthehesha në atë kohë, tipari që mund të paralajmëronte natyrën e liderit që u bëra më vonë, ishte mospranimi i kufijve. Unë, që fare i vogël, nuk i pranoja kufijtë si imponim apo si fat. Përpiqesha gjithmonë t’i shkelja, t’i shtyja…” tha Rama. Ai shtoi se ky refuzim e ka motivuar gjatë gjithë jetës, nga Akademia e Arteve deri tek politika.

“Kam qenë rebel, thyeja thuajse çdo kufi, por i bullizuar asnjëherë. Kam në jetën time dy rrahje, ku nuk kam rrahur por më kanë rrahur,” vijoi kryeministri. Rama rrëfeu detajet e dy episodeve të dhunës. I dyti ndodhi në dyshemenë e pallatit të sportit Partizani, pas një ndeshjeje të tensionuar me Apolloninë. Si lojtar provokator, ai paguoi me një rrethim nga disa të rinj. Më i rëndi ishte sulmi i janarit 1997, kur i bënë pritë te rruga e hyrjes së shtëpisë. “Më lanë duke menduar se isha i asaj bote,” u shpreh ai, duke shtuar se vetëm lartësia dhe fiziku sportiv e shpëtuan, sipas mjekëve në Shqipëri dhe Francë.

Në lidhje me deklaratat e Sali Berishës për sulmin e ’97-s, Rama u përgjigj prerë: “Riprodhohen nga një gojë e shthurur që nuk dua të merrem.” Ai sqaroi se ngjarja nuk kishte lidhje me krim pasioni dhe se nuk ishte me një burrë, por me një vajzë me të cilën bashkë jetonte dhe me një mik nga Shkodra.

Rama u ndal edhe te autorët e sulmit. “Njëri nga ata janë plotësisht të njohur për mua, njëri është penduar, tani ka ndërruar jetë, tjetri nuk e ka pranuar dhe as e kam pyetur, por është penduar në një mënyrë tjetër duke treguar miqësi…” përfundoi kryeministri.