“Javën e ardhshme krijojmë Ministrinë e Administratës Publike”- Kryeministri Rama njofton portofolin e ri në Qeveri: Do drejtohet nga…

Qeveria do të pasurohet me një dikaster të ri kushtuar tërësisht administratës publike. Lajmi u bë i ditur nga kryeministri Edi Rama, i cili njoftoi se Ministria e Administratës Publike do të krijohet javën e ardhshme.

Sipas kreut të ekzekutivit, kjo fushë tashmë zë një vend qendror në axhendën qeverisëse. Ajo lidhet drejtpërdrejt edhe me procesin e integrimit europian të Shqipërisë. Për këtë arsye u vendos ngritja e një strukture më vete.

Gjatë prononcimit të tij, Rama vlerësoi punën e deritanishme të ministres së Shtetit për Administratën Publike, Adea Pirdeni. Ai u shpreh i bindur se ajo do të marrë drejtimin e institucionit të ri dhe do të sigurojë funksionimin e tij.

“Dua ta ndaj me ju sot që do të krijojmë javën e ardhshme ministrinë e Administratës Publike, pikërisht sepse tanimë më tema e administratës publike është një temë shumë qendrore e punës së qeverisë dhe e shtetbërjes së mëtejshme europiane të Shqipërisë. Është nevoja që përmes Ministrisë së Administratës Publike, një model që e kanë dhe shumë vende të tjera europiane, ne të zgjerojmë gamën e detyrave, gamën e punëve, gamën e ambicieve për të ngritur më lart shtetin europian të shqiptarëve”, deklaroi Rama.

Kryeministri e cilësoi këtë ministri si një model të njohur tashmë në shumë shtete europiane. Përmes saj, sipas tij, do të zgjerohet ndjeshëm detyrat dhe ambiciet për konsolidimin e shtetit europian të shqiptarëve.

Ai theksoi gjithashtu angazhimin e ministres Pirdeni në trajtimin e dosjeve të administratës publike. Puna e bërë deri tani, sipas tij, përbën themelet për ndërtimin e një institucioni shembullor.

“Nuk diskutohet që Ministrinë e Administratës Publike mund ta drejtojë dhe ta çojë përpara vetëm ministrja e Shtetit për Administratën Publike. Adea të falënderoj për përkushtimin, për faktin që asnjëherë nuk i jep lirë fjalët e mira, as fjalët e këqija, por je gjithmonë e angazhuar që çdo fjalë apo çështje që trajton të mos bjerë në tokë. Kam shumë besim që me këtë bazë që është ndërtuar, me çdo gur kilometrik që ke vendosur, do arrish që ministrinë e Administratës Publike të RSH ta kthesh në një institucion model siç duhet të jetë model administrata publike”, u shpreh Rama.