Java 3-të e Superiores mbyllet me përmbysje, Dinamo i merr 3 pikët Elbasanit -

Java e tretë e kampionatit të futbollit "Abissnet Superiore" u mbyll me një ndeshje të fortë mes Dinamos dhe Elbasanit. Ekipi dinamovit arriti të marrë fitoren dhe tri pikët e plota në fund të kësaj jave.

Elbasanët ishin ata që hapën serinë e golave, duke kaluar në avantazh në minutën e 25-të përmes Nikajt. Megjithatë, gëzimi i tyre nuk zgjati shumë. Vetëm 12 minuta më vonë, Berisha realizoi për Dinamon, duke rivendosur barazimin në 1-1.

Pjesa e parë u mbyll në barazim, por dinamovitë ishin më këmbëngulës pas kthimit nga pushimi. Në minutën e 65-të, Lorenco Vila gjeti rrjetën duke përmbysur krejtësisht rezultatin. Ky gol vendimtar i dha fitoren skuadrës së tij, me shifrat përfundimtare 2-1.

Me këtë rezultat, Dinamo ngjitet në kuotën e gjashtë pikëve. Kjo fitore i mundëson ngjitjen në vendin e tretë të renditjes pas tri javëve të para të kampionatit.