Ish-prokurori fiton në Strasburg: Shkarkimi nga vettingu joproporcional, Shqipëria duhet t’i paguajë…

Gjykata Europiane e të Drejtave të Njeriut i ka dhënë të drejtë ish-prokurorit Adnand Kosova. Beteja ligjore në Strasburg u mbyll në favor të tij.

Pas shqyrtimit të çështjes, trupi gjykues arriti në konkluzionin se masa e shkarkimit nuk ishte e justifikuar. Në vendim citohet se “shkarkimi i aplikantit nuk u tregua proporcional me qëllimet legjitime të ndjekura”.

Sipas Gjykatës, nëse vetë Kosova e kërkon, procesi i Vettingut mund të rihapet. Çështja duhet të rishqyrtohet duke respektuar garancitë e nenit 8.

Strasburgu ka ngarkuar shtetin shqiptar me detyrimin financiar. Shqipëria duhet t'i paguajë 6 mijë euro për dëmin jomaterial. Gjithashtu duhet të mbulojë 5 mijë euro për kostot dhe shpenzimet e procedimit.

Vendimi për largimin e tij nga sistemi ishte marrë nga Komisioni i Posaçëm i Apelimit. Bëhet fjalë për shkallën e dytë të Vettingut. Tashmë ai vendim është vlerësuar si joproporcional nga Strasburgu.

Kosova ka një karrierë të gjatë në prokurori. Ai shërbeu në Prokurorinë e Krimeve të Rënda që prej dhjetorit 2004. Për një periudhë ka drejtuar edhe këtë institucion. Në kohën kur u përjashtua nga drejtësia, mbante postin e prokurorit pranë Prokurorisë së Përgjithshme.