Integrimi në BE / Zhvillohet në Tiranë Konferenca Ndërparlamentare me pjesëmarrjen e udhëheqësve të lartë dhe përfaqësuesve evropianë

Tirana është sot mikpritëse e Konferencës Ndërparlamentare kushtuar “Agjendës strategjike për zgjerimin e BE-së dhe anëtarësimin e Shqipërisë”. Ngjarja e nivelit të lartë mbledh në një tryezë përfaqësues të institucioneve shqiptare, të Parlamentit Evropian dhe të legjislativëve të shteteve anëtare.

Në fokus të debatit do të jetë ecuria e zgjerimit të Bashkimit Evropian. Po ashtu do të diskutohet zbatimi i reformave kryesore, ruajtja e stabilitetit në rajon dhe hapat konkretë që Shqipëria duhet të ndërmarrë drejt anëtarësimit të plotë.

Konferenca çel punimet me fjalë përshëndetëse nga krerët më të lartë institucionalë. Fjala i takon Kryetarit të Kuvendit Niko Peleshi, Kryeministrit Edi Rama, Ambasadores së BE-së në Tiranë Sofia Moreira de Sousa dhe raportuesit për Shqipërinë në Parlamentin Evropian Andreas Schieder.

Axhenda parashikon tre seanca themelore. Ato do të trajtojnë zgjerimin dhe integrimin e Shqipërisë, peshën strategjike të këtij procesi për sigurinë dhe reformat, si dhe rolin drejtues të parlamenteve në çuarjen përpara të rrugës evropiane. Panelet do të moderohen nga kryetari i Komisionit për Evropën dhe Punët e Jashtme Igli Hasani, së bashku me përfaqësues të delegacioneve pjesëmarrëse.