Ibrahimaj në Ministerialin Ekonomik: Fokusi ynë te integrimi ekonomik rajonal dhe afrimi me tregun europian! Rezultate të matshme

Ibrahimaj nga Cetinja: Nga marrëveshjet te përfitimet konkrete, më pranë tregut europian

Ministerialja ekonomike e Procesit të Berlinit mblodhi në Cetinje të Malit të Zi ministrat e Ekonomisë nga gjashtë vendet e Ballkanit Perëndimor. Të pranishëm ishin edhe përfaqësues të Komisionit Europian, të organizatave rajonale dhe të institucioneve ndërkombëtare financiare. Shqipëria u përfaqësua nga ministrja e Ekonomisë dhe Inovacionit, Delina Ibrahimaj.

Ecuria e planit të veprimit për Tregun e Përbashkët Rajonal ishte boshti kryesor i diskutimeve. U fol për thellimin e bashkëpunimit mes ekonomive të rajonit. Në tryezë ishte edhe ngushtimi i hendekut me Bashkimin Europian, përmes heqjes së pengesave tregtare dhe forcimit të konkurrueshmërisë.

Gjatë fjalës së saj, Ibrahimaj kërkoi që vëmendja të zhvendoset te zbatimi në terren. Faza e re, sipas saj, duhet të sjellë dobi të prekshme për kompanitë dhe qytetarët.

“Prioriteti ynë duhet të jetë i qartë: të kalojmë nga angazhimet te zbatimi dhe nga marrëveshjet te rezultatet e matshme për bizneset dhe qytetarët”, u shpreh Ibrahimaj.

Ajo prezantoi edhe drejtimin shqiptar të CEFTA-s, që përkon me vitin e 20-të të marrëveshjes. Në qendër janë lehtësimi i shkëmbimeve dhe ulja e kostove për sipërmarrjet. Paketa parashikon shtrirjen e Korsive të Gjelbra dhe unifikimin e orareve të autoriteteve në pikat kufitare. Po ashtu synohen kontrolle më të thjeshta për frutat e perimet, njohja e rezultateve të vlerësimit të konformitetit për produktet industriale dhe shfrytëzimi i shërbimeve elektronike të besimit.

“Integrimi rajonal nuk duhet të matet me numrin e marrëveshjeve që miratojmë, por me kohën dhe paratë që bizneset kursejnë dhe me mundësitë që krijojmë për to që të rriten”, deklaroi ministrja.

Përtej tregtisë, ajo nënvizoi nevojën për një hapësirë më të bashkuar për investimet, prodhimin dhe inovacionin. Një nga shtyllat e drejtimit shqiptar është “Higher Quality Investment & Higher Productivity”. Qëllimi është tërheqja e kapitaleve që sjellin teknologji dhe aftësi të reja, rrisin produktivitetin dhe krijojnë vende pune e kompetenca. Ajo theksoi ndërtimin e zinxhirëve rajonalë të vlerës në fusha me potenciale plotësuese. Të tillë janë agroushqimi, prodhimi, turizmi dhe shërbimet. E rëndësishme mbetet edhe lidhja më e fortë e firmave të rajonit me zinxhirët europianë të vlerës. Inovacioni, digjitalizimi dhe kapitali njerëzor u cilësuan faktorë kyç për garën e së ardhmes.

Vëmendje iu kushtua edhe raportit mes bashkëpunimit rajonal dhe rrugës drejt BE-së. Ibrahimaj sqaroi se Tregu i Përbashkët Rajonal nuk zëvendëson anëtarësimin. Ai shërben si mjet konkret për ta përshpejtuar atë.

“Për Shqipërinë, Tregu i Përbashkët Rajonal nuk është alternativë ndaj integrimit europian. Ai është një instrument praktik për përshpejtimin e tij”, u shpreh Ibrahimaj.

Ajo veçoi rolin e Planit të Rritjes për Ballkanin Perëndimor. Ky plan e lidh bashkëpunimin ekonomik në rajon me hyrjen graduale në Tregun Unik Europian. Ai mbulon mallrat, shërbimet, lëvizjen e punonjësve, SEPA-n, transportin rrugor, energjinë dhe integrimin digjital.

“Shqipëria është vendi me përformancën më të mirë në rajon sa i përket implementimit të Planit të Rritjes”, deklaroi ministrja.

Për etapën e ardhshme, ministrja kërkoi ruajtjen e standardeve të përbashkëta. Vendet e përgatitura, sipas saj, mund të ecin më shpejt në fusha të caktuara. “Fleksibiliteti duhet të përshpejtojë integrimin, jo të krijojë fragmentim”, theksoi ministrja.

Në fund, Ibrahimaj i ftoi homologët dhe partnerët ndërkombëtarë në Tiranë. Takimi do të mbahet në kuadër të 20-vjetorit të CEFTA-s. Atje do të vijojë debati për fazën e re të integrimit ekonomik të rajonit.