I vuri zjarrin tokës për ta pastruar nga mbeturinat, arrestohet 70-vjeçari! Momenti kur kapet në flagrancë

Një 70-vjeçar është vënë në pranga në Përmet, pasi dyshohet se shkaktoi zjarr në një sipërfaqe toke në fshatin Leus.

Sipas policisë, flakët janë ndezur me qëllim pastrimin e parcelës që ai kishte në përdorim.

Zjarri më pas u përhap me shpejtësi. Si pasojë u dogj një sipërfaqe e konsiderueshme pyjore.

Ngjarja u zbulua falë ndërhyrjes së menjëhershme të uniformave blu. Policia bën me dije se arrestimi erdhi pas veprimeve hetimore dhe operacionale të zhvilluara në zbatim të detyrave të lëna nga Drejtori i Përgjithshëm i Policisë së Shtetit.

Qëllimi ishte parandalimi i zjarrvënieve dhe nxjerrja para përgjegjësisë penale e autorëve.

Në këtë kuadër, shërbimet e Komisariatit të Policisë Përmet arrestuan shtetasin me iniciale V. Xh., 70 vjeç, banues në Leus. Ai u kap në flagrancë pranë vatrës së zjarrit.

Bëhet fjalë për sipërfaqen që ai shfrytëzonte në vendin e quajtur "Arra e Gjatë", ku dyshohet se vetë ndezi flakët për ta pastruar. Përhapja e zjarrit solli djegien e një zone të gjerë me pyje.

Materialet procedurale janë referuar tashmë në Prokurori për veprime të mëtejshme.