I vuri zjarrin pyjeve të Vajkalit dhe rrezikoi banorët, Policia procedon piromanin! Autori me probleme të shëndetit mendor, e shtrojnë në Psikiatri

Në malin e fshatit Vajkal të Bashkisë Bulqizë, flakët e zjarrit vijojnë të shkrumbëojnë sipërfaqe të tëra me pyje e kullota prej dy ditësh, duke rrezikuar banorët e zonës. Lidhur me këtë ngjarje, blutë e Bulqizës kanë identifikuar e marrë nën hetim autorin e dyshuar.

Bëhet fjalë për shtetasin A. M., 49 vjeç, i cili është proceduar në gjendje të lirë nga specialistët për Hetimin e Krimeve të Komisariatit të Policisë Bulqizë. Mësohet se ai vuan nga probleme të rënda të shëndetit mendor.

Në lidhje me rastin, Uniformat Blu u shprehën se menjëherë pas njoftimit për zjarrin, shërbimet u nisën në vendngjarje. Aty mbështetën forcat zjarrfikëse dhe kryen veprime hetimore për të zbardhur autorësinë e zjarrvënies.

Nga hetimet, u bë e mundur identifikimi i 49-vjeçarit. Materialet u referuan në Prokurori, e cila nisi procedimin penal. Sipas informacionit zyrtar, 49-vjeçari u dërgua në Spitalin Psikiatrik të Shkodrës për trajtim të specializuar.

Drejtoria Vendore e Policisë Dibër apeloi ndaj qytetarëve të mos ndezin zjarre për djegien e mbetjeve, barishteve apo për qëllime të tjera. Sipas njoftimit, përhapja e flakëve mund të shkaktojë pasoja të rënda për jetën, pronën dhe mjedisin.

Gjithashtu, policia bëri thirrje që çdo rast zjarrvënieje apo paligjshmërie tjetër të denoncohet në numrin 112, duke garantuar një reagim të menjëhershëm.