I dënuar me 2 vjet burg të formës së prerë, ish-kryeprokurori Llalla kërkon të shpëtojë me procedurë! Pretendon se kaloi afati ligjor, do parashkrimin e veprës

Ish-kryeprokurori Adriatik Llalla ka kërkuar që dënimi i dhënë ndaj tij të deklarohet i parashkruar. Ai pretendon se afati ligjor për vënien në ekzekutim të vendimit ka përfunduar.

Njoftimi për këtë kërkesë është bërë publik nga gazetarja Anila Hoxha. Emri i ish-Prokurorit të Përgjithshëm figuron në listën e kërkesave penale që kanë si objekt parashkrimin.

I dënuar me vendim të formës së prerë nga drejtësia shqiptare, Llalla kërkon verifikimin e çështjes në përputhje me parashikimet ligjore për afatet e ekzekutimit të dënimit.

Më 13 dhjetor 2021, ai u ndalua në Romë. Arrestimi u krye pas urdhrit të shpallur nga Interpol Tirana. Urdhri u lëshua pasi Gjykata e Posaçme e Apelit e dënoi atë me dy vjet heqje lirie.

Përveç dënimit me burg, gjykata i ndaloi Llallës ushtrimin e çdo funksioni publik për pesë vjet. Po ashtu, atij iu konfiskuan pasuri të paluajtshme, mes të cilave toka dhe një apartament.